Ukraina atrofidagi vaziyatni tinch yo‘l bilan hal qilishning iloji bo‘lmadi, chunki buni G‘arb xohlamadi. Bu haqda Rossiya tashqi ishlar vaziri Sergey Lavrov “RBK”ga bergan intervyusida aytib o‘tdi.
“Bu umuman Ukraina haqida emas. To‘g‘rirog‘i, Ukraina emas, balki jahon huquqiy tartibi haqida. AQSh butun Yevropani egallab olgan. Bu zamonaviy tarixning eng muhim davri. Bu dunyo tartibini qay yo‘sinda o‘rnatish uchun kurashni aks ettiradi”, — dedi Lavrov.
Vazirning so‘zlariga ko‘ra, G‘arb davlatlari “muayyan qoidalarga asoslangan dunyo tartibi” atamasini o‘ylab topishgan. “Bu qoidalar tor doirada yozilgan. Bunga parallel ravishda tor doiradagi, norasmiy tuzilmalar yaratildi. Gumanitar qonun va BMTning maxsus agentligi bor. Yevropa Ittifoqida esa bunday masalalar bo‘yicha maxsus hamkorlik yaratildi, u yerda qarorlar jahon hamjamiyatini hisobga olmasdan qabul qilinadi”, — ta’kidladi u.
“Siz nima uchun tinch yo‘l bilan hal qilib bo‘lmadi, deb so‘radingiz. Biz muammoni tinch yo‘l bilan hal qilishni ko‘p yillar davomida taklif qilib kelayotgandik”, — dedi Lavrov.
2021-yilning dekabr oyida Rossiya AQSh va NATOga xavfsizlik kafolatlari bo‘yicha takliflar kiritgan edi. Unda Moskva sakkiz bandni amalga oshirishni talab qilgan: jumladan bular bir-birining xavfsizligiga zarar yetkazmaslik, boshqa davlatlardan qurolli hujumga tayyorgarlik ko‘rish maqsadida foydalanmaslik, NATOni sharqqa tomon kengaytirmaslik, NATOning sobiq SSSR mamlakatlarida bazalar tashkil etishiga yo‘l qo‘ymaslik, qurolli kuchlarni bir chiziqda joylashtirmaslik, mamlakatlarning o‘rta va qisqa masofali raketalarini, shuningdek, yadro qurollarini milliy hududdan tashqarida joylashtirmaslik kabilarni o‘z ichiga oladi.
Moskvaning ta’kidlashicha, NATO va AQSh Rossiyaning takliflarini e’tiborsiz qoldirgan.
24-fevral kuni esa Rossiya prezidenti Vladimir Putin Donbassdagi mahalliy aholini “genotsid”dan qutqarish maqsadida maxsus operatsiya boshlanganini e’lon qildi.
Izoh (0)