Ijtimoiy tarmoqlarda Toshkent viloyati Nurafshon shahri ichki ishlar bo‘limi xodimlari o‘qotar qurolni yig‘a olmagani aks etgan videolavhalar tarqaldi. Viloyat IIB matbuot kotibi Bobur To‘laganov holatga munosabat bildirdi.
Qayd etilishicha, Toshkent viloyati IIBB Kasbiy tayyorgarlik bo‘limi tomonidan 100 foiz shaxsiy tarkib o‘rtasida xodimlarning kasbiy bilim mahorati (test), jismoniy va jangovar tayyorgarligi hamda quroldan foydalanish (qismlarga ajratish yig‘ish va o‘q otish) bo‘yicha maxsus sinovlar o‘tkazilgan. Shahar IIB huzuridagi Tergov bo‘linmasi boshlig‘i Mirali Abdurahmonov va IIB boshlig‘ining birinchi o‘rinbosari Suhrob Arafotov sinov jarayonida AK-74 o‘qotar qurolini yig‘ishda xatoga yo‘l qo‘ygan.
“Afsuski videoda faqatgina ushbu vazifani bajara olmaganlar namoyish etilgan. Real jarayonda esa qurolni to‘liq va noto‘liq qismlarga ajratish, yig‘ish, o‘q otish vazifalarini maksimal va a’lo darajada bajargan xodimlar nisbati 90 foizni tashkil qilgan”, — deyiladi vazirlik munosabatida.
Sinovlarni 95 foiz xodimlar muvaffaqiyatli bajargan. Ayrim yo‘nalishlar bo‘yicha o‘ta olmagan 5 foiz xodimlarning 3 foizi qayta topshirish natijalariga ko‘ra vazifalarni bajargan. Ko‘p sonli shaxsiy tarkibning 2 foizi esa vazifalarni qayta o‘zlashtirish maqsadida maxsus malaka oshirish markaziga yuborilishi belgilangan.
“Bu kabi nazorat sinovlaridan pirovard maqsad esa aholimiz xavfsizligi va jamoat tartibini ishonchli ta’minlashga qaratilgan. Hurmatli fuqarolar, sizning xavfsizligingiz ishonchli qo‘llarda”, — deya yozgan Bobur To‘laganov.
Uning ta’kidlashicha, yuqoridagi ikki xodim qayta sinovda AKS-74 qurolini qismlarga ajratgan va qayta yig‘ib, vazifani muvaffaqiyatli bajargan.
Avvalroq Qonunchilik palatasining majlisida “Qurol to‘g‘risidagi qonunchilik takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish haqida”gi qonun loyihasi birinchi o‘qishda konseptual jihatdan ko‘rib chiqilgandi. Qonun bilan qurol muomalasi sohasidagi nazorat Milliy gvardiyadan ichki ishlar organlariga o‘tkazilmoqda.
Eslatib o‘tamiz, O‘zbekistonda “Qurol to‘g‘risidagi” qonun 2019-yil 29-iyulda prezident tomonidan imzolangan. Fuqaroviy va xizmat qurolini hamda uning o‘q-dorilarini ishlab chiqarish, ta’mirlash va realizatsiya qilish bo‘yicha faoliyat faqat O‘zbekiston hududida belgilangan tartibda ro‘yxatdan o‘tgan yuridik shaxslar tomonidan amalga oshiriladi. O‘zbekistonda noqonuniy saqlangan qurollarni o‘z ixtiyori bilan IIVga topshirganlarga pul mukofoti beriladi.
Izoh (0)