Qo‘qon shahar hokimining birinchi o‘rinbosari 10 ming dollar pora olayotganda qo‘lga olingani xabar qilingandi. Unda mansabdor “Qo‘qon mintaqaviy temiryo‘l uzeli” moliya bo‘limi boshlig‘i o‘rinbosari O.M. bilan birga ushlangani aytilgandi. Ularga nisbatan sud hukmi o‘qildi, deb xabar bermoqda O‘zA.
Qayd etilishicha, 180 ming dollar miqdorida pora olmoqchi bo‘lgan Abduhalil Nurmatov va “Qo‘qon mintaqaviy temir yo‘llari uzeli” moliya bo‘limi boshlig‘i o‘rinbosari O. Mamajonovga nisbatan sud ishi bo‘lib o‘tgan. Jinoyat ishlari bo‘yicha Beshariq tuman sudi tomonidan mazkur jinoyat ishi ko‘rib chiqilib, A.Nurmatovga 5 yil 6 oy, O.Mamajonovga 5 yil 3 oy ozodlikdan mahrum qilish jazosi tayinlangan.
Eslatib o‘tamiz, mansabdorlar jinoiy til biriktirib, bir tadbirkorga mazkur temiryo‘l uzeli balansida bo‘lgan 2,5 gektar yer maydonidagi bino va inshootlar bo‘yicha o‘tkaziladigan auksion savdolarda uning foydasiga qaror chiqartirib berish evaziga 180 ming dollari talab qilgan. Talab qilgan puldan 10 ming dollarini olayotgan paytda ular tegishli organlarning tezkor xodimlari tomonidan qo‘lga olingandi. Ularga nisbatan firibgarlik va pora berishga qasd qilish alomatlari bilan jinoyat ishi qo‘zg‘atilib, qamoqqa olingan.
Keyinroq “Qo‘qon mintaqaviy temiryo‘l uzeli” rahbariyati mazkur holatga korxonaning mutlaqo aloqasi yo‘qligini ma’lum qilgandi. Shuningdek, “O‘zbekiston temir yo‘llari” ham raddiya bergan — “Korxonada hech qanday sotuvga qo‘yilgan yer maydoni ham mavjud emas”. DXX matbuot xizmati tomonidan tasdiqlangan xabarlarda ham “Qo‘qon mintaqaviy temiryo‘l uzeli” balansidagi yer maydoni haqida ma’lumot keltirilmagani qo‘shimcha qilingan.
Izoh (0)