Нурафшон шаҳар ИИБ масъул ходимлари ўқотар қуролни йиға олмади (видео)

Ижтимоий тармоқларда Тошкент вилояти Нурафшон шаҳри ички ишлар бўлими ходимлари ўқотар қуролни йиға олмагани акс этган видеолавҳалар тарқалди. Вилоят ИИБ матбуот котиби Бобур Тўлаганов ҳолатга муносабат билдирди.

Қайд этилишича, Тошкент вилояти ИИББ Касбий тайёргарлик бўлими томонидан 100 фоиз шахсий таркиб ўртасида ходимларнинг касбий билим маҳорати (тест), жисмоний ва жанговар тайёргарлиги ҳамда қуролдан фойдаланиш (қисмларга ажратиш йиғиш ва ўқ отиш) бўйича махсус синовлар ўтказилган. Шаҳар ИИБ ҳузуридаги Тергов бўлинмаси бошлиғи Мирали Абдураҳмонов ва ИИБ бошлиғининг биринчи ўринбосари Суҳроб Арафотов синов жараёнида АК-74 ўқотар қуролини йиғишда хатога йўл қўйган.

«Афсуски видеода фақатгина ушбу вазифани бажара олмаганлар намойиш этилган. Реал жараёнда эса қуролни тўлиқ ва нотўлиқ қисмларга ажратиш, йиғиш, ўқ отиш вазифаларини максимал ва аъло даражада бажарган ходимлар нисбати 90 фоизни ташкил қилган», — дейилади вазирлик муносабатида.

Синовларни 95 фоиз ходимлар муваффақиятли бажарган. Айрим йўналишлар бўйича ўта олмаган 5 фоиз ходимларнинг 3 фоизи қайта топшириш натижаларига кўра вазифаларни бажарган. Кўп сонли шахсий таркибнинг 2 фоизи эса вазифаларни қайта ўзлаштириш мақсадида махсус малака ошириш марказига юборилиши белгиланган.

«Бу каби назорат синовларидан пировард мақсад эса аҳолимиз хавфсизлиги ва жамоат тартибини ишончли таъминлашга қаратилган. Ҳурматли фуқаролар, сизнинг хавфсизлигингиз ишончли қўлларда», — дея ёзган Бобур Тўлаганов.

Унинг таъкидлашича, юқоридаги икки ходим қайта синовда АКС-74 қуролини қисмларга ажратган ва қайта йиғиб, вазифани муваффақиятли бажарган.

Аввалроқ Қонунчилик палатасининг мажлисида «Қурол тўғрисидаги қонунчилик такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида»ги қонун лойиҳаси биринчи ўқишда концептуал жиҳатдан кўриб чиқилганди. Қонун билан қурол муомаласи соҳасидаги назорат Миллий гвардиядан ички ишлар органларига ўтказилмоқда.

Эслатиб ўтамиз, Ўзбекистонда «Қурол тўғрисидаги» қонун 2019 йил 29 июлда президент томонидан имзоланган. Фуқаровий ва хизмат қуролини ҳамда унинг ўқ-дориларини ишлаб чиқариш, таъмирлаш ва реализация қилиш бўйича фаолият фақат Ўзбекистон ҳудудида белгиланган тартибда рўйхатдан ўтган юридик шахслар томонидан амалга оширилади. Ўзбекистонда ноқонуний сақланган қуролларни ўз ихтиёри билан ИИВга топширганларга пул мукофоти берилади.