Qoraqalpog‘istonning Mo‘ynoq tumanida Toshkent—Nukus—Mo‘ynoq yo‘nalishida aviaparvoz yo‘lga qo‘yiladi. Bu haqda tuman hokimi Baxtiyar Menglibekov “Daryo” muxbiri bilan suhbatda aytib o‘tdi.
Hokimning aytishicha, Mo‘ynoq tumani rivojlantirishga qaratilgan joriy yildagi “yo‘l xaritasi” ishlab chiqilgan.
“Bunda tadbirkorlik, qishloq xo‘jaligi, turizm, sanoat sohalarni rivojlantirish borasida rejalar o‘rin olgan. Shuningdek, prezident haftada ikki marta Toshkent—Nukus—Mo‘ynoq yo‘nalishida aviaparvozlarni yo‘lga qo‘yish topshirig‘ini berdi. Navro‘z bayrami arafasida birinchi aviaparvozni amalga oshirishni reja qilyapmiz. Aeroport doimiy ishlasa tumanda yashovchi ko‘pgina fuqarolar ish bilan ta’minlanadi, ularning bandligi ta’minlanadi”, — deydi Baxtiyar Menglibekov.
Eslatib o‘tamiz, Shavkat Mirziyoyev 23—24-fevral kunlari Qoraqalpog‘istonga tashrifi davomida Mo‘ynoq tumanida bo‘lib, “haftada ikki marta Toshkent—Mo‘ynoq—Nukus yo‘nalishida parvozlar bo‘lishini” aytgan edi.
“Bu aeroport rasmga tushish uchun emas, insonlarga xizmat qiladigan bo‘lishi kerak”, — degan edi prezident.
Ma’lumot uchun, Mo‘ynoq — O‘zbekiston shimoli-g‘arbiyda joylashgan shahar nomidagi aeroport bo‘lib, 1947-yilda qurilgan. 3-klassga oid Mo‘ynoq aerodromi An-24, Yak-40 va boshqa yengil samolyotlarni, shuningdek, barcha turdagi vertolyotlarni qabul qilishga qodir bo‘lgan. 1960-yillar boshidan 1990-yilga qadar aerodromda An-2 samolyotlari kuniga mahalliy liniyalar bo‘yicha (asosan, Qo‘ng‘irot, Nukus, Urganch, Taxtako‘prik, Qozoqdaryo, Aspantay, Tuley punktlari) 19 tagacha yo‘lovchi aviareyslarini amalga oshirgan. 2020-yilning avgustida Mo‘ynoqda yangi aeroport ishga tushgan edi.