“Londonga borish orzuyimdan mahrum qilishdi”. Ramzan Qodirov Britaniya sanksiyalari haqida

Ramzan Qodirov Londonga borishni orzu qilib kelgani, ammo endi bu imkoniyatdan mahrum bo‘lganini aytdi. Bu haqda u Britaniya sanksiyalariga javoban Telegram-kanalida yozgan.

“Men orzu qilardim. Bu orzuni qadrladim, uni nekbinlik bilan sug‘orardim, u amalga oshadigan kunni hayajon bilan kutardim. Orzuyimda amalga oshmaydigan biror narsa yo‘q edi — men Buyuk Britaniyaga borishni istardim.

Shunchaki u yerga tashrif buyurish. London bo‘ylab sayr qilish, Tauer ko‘prigidan Temzani tomosha qilib zavqlanish, Big Ben va Bukingem saroyini tomosha qilish... Lekin, afsuski, orzular amalga oshmaydiganga o‘xshaydi. Maqsad yaqindek tuyulgandi, ammo Boris Jonson va uning jamoasi meni bu imkoniyatdan mahrum qilishdi”, — deydi Checheniston rahbari.

U Britaniya rasmiylarini noto‘g‘ri xatti-harakatlari uchun qoraladi va “uni burchakka tiqmaslikni” maslahat berib, uning g‘azabi oldida “sanksiyalar gul bo‘lib qolishi”ni aytdi.

Shu bilan birga, Qodirov ushbu sanksiyalardan g‘ururlanishini ham qayd etgan.

“Axmat-Yurtlik oddiy bola bir necha o‘n yillardan so‘ng Amerikani va butun Yevropani qo‘rquvga solishini, shuning uchun uni shaxsiy sanksiyalar bilan izolyatsiya qilishga urinishlarini kim o‘ylabdi. Bu nafaqat men, balki butun qishlog‘imiz, xalqimiz uchun sharafdir”, — deya postini yakunlagan Qodirov.

Qodirov Buyuk Britaniyaning rossiyalik jismoniy va yuridik shaxslarga qarshi sanksiyalari ro‘yxatiga tushgan.

Oxirgi haftalarda G‘arb Moskvaning Ukrainadagi maxsus harbiy amaliyoti tufayli Rossiya, uning iqtisodiyoti, korxonalari va fuqarolariga nisbatan bir necha bor yangi sanksiyalar kiritdi.