Qirg‘iziston va Tojikiston chegarachilari o‘rtasida bir kun ichida ikkinchi marta otishma sodir bo‘ldi. Bu haqda Qirg‘iziston davlat chegara xizmati matbuot xizmatiga tayanib, “RIA Novosti” xabar berdi.
“2022-yilning 11-mart kuni soat 02:50 larda Qirg‘iziston—Tojikiston davlat chegarasi hududida ikki mamlakat chegarachilari o‘rtasida navbatdagi otishma sodir bo‘ldi”, — deyiladi xabarda.
Ta’kidlash kerakki, qirg‘iz-tojik chegarachilari o‘rtasidagi birinchi otishma 10-mart kuni ertalab sodir bo‘lgandi. Chegarachilar o‘rtasida yuzaga kelgan mojaro oqibatida Tojikiston tomonidan bir nafar chegarachi halok bo‘lgan, yana ikki nafari yaralangan.
Eslatib o‘tamiz, 2022-yilning yanvar oxirlarida ham Qirg‘iziston va Tojikiston chegara hududlaridan birida ikki davlat harbiylari o‘rtasida otishma yuz bergandi. O‘shanda Tojikiston tomonidan 11 kishi, Qirg‘iziston tarafidan esa 4 kishiga yaralangandi.
Tojikiston va Qirg‘iziston o‘rtasidagi bu kabi nizolar 1990-yillardan buyon kuzatiladi, ikki davlat o‘rtasida 950 kilometr chegara hududi belgilab olinmagan va unda ikki tomon kelisha olmayotgan bahsli joylar juda ko‘p. Chegarani demarkatsiya va delimitatsiya qilish yuzasidan muzokaralar 2002-yilda boshlangan va shu kunga qadar ikki yuzdan ziyod komissiya yig‘ilishlari o‘tkazilib, ishchi guruhlar tuzilgan. Ayni vaqtda delimitatsiya va demarkatsiya qilish bo‘yicha chegaraning 550 kilometrga yaqin liniyasi tartibga solinishi boshlangan. Biroq ikki mamlakat o‘rtasida vaqti-vaqti bilan goh aholi, goh chegarachilar o‘rtasida nizolar, otishmalar sodir bo‘lishi to‘xtagani yo‘q.
Izoh (0)