«Лондонга бориш орзуйимдан маҳрум қилишди». Рамзан Қодиров Британия санкциялари ҳақида

Рамзан Қодиров Лондонга боришни орзу қилиб келгани, аммо энди бу имкониятдан маҳрум бўлганини айтди. Бу ҳақда у Британия санкцияларига жавобан Telegram-каналида ёзган.

«Мен орзу қилардим. Бу орзуни қадрладим, уни некбинлик билан суғорардим, у амалга ошадиган кунни ҳаяжон билан кутардим. Орзуйимда амалга ошмайдиган бирор нарса йўқ эди — мен Буюк Британияга боришни истардим.

Шунчаки у ерга ташриф буюриш. Лондон бўйлаб сайр қилиш, Тауэр кўпригидан Темзани томоша қилиб завқланиш, Биг Бен ва Букингем саройини томоша қилиш... Лекин, афсуски, орзулар амалга ошмайдиганга ўхшайди. Мақсад яқиндек туюлганди, аммо Борис Жонсон ва унинг жамоаси мени бу имкониятдан маҳрум қилишди», — дейди Чеченистон раҳбари.

У Британия расмийларини нотўғри хатти-ҳаракатлари учун қоралади ва «уни бурчакка тиқмасликни» маслаҳат бериб, унинг ғазаби олдида «санкциялар гул бўлиб қолиши»ни айтди.

Шу билан бирга, Қодиров ушбу санкциялардан ғурурланишини ҳам қайд этган.

«Ахмат-Юртлик оддий бола бир неча ўн йиллардан сўнг Американи ва бутун Европани қўрқувга солишини, шунинг учун уни шахсий санкциялар билан изоляция қилишга уринишларини ким ўйлабди. Бу нафақат мен, балки бутун қишлоғимиз, халқимиз учун шарафдир», — дея постини якунлаган Қодиров.

Қодиров Буюк Британиянинг россиялик жисмоний ва юридик шахсларга қарши санкциялари рўйхатига тушган.

Охирги ҳафталарда Ғарб Москванинг Украинадаги махсус ҳарбий амалиёти туфайли Россия, унинг иқтисодиёти, корхоналари ва фуқароларига нисбатан бир неча бор янги санкциялар киритди.