Англия Премьер Лигасида февраль ойининг энг яхшилари аниқланди

Англия Премьер Лигаси февраль ойининг энг яхшилари номини маълум қилди.

«Ньюкасл» устози Эдди Ҳау Англия Премьер Лигасининг февраль ойидаги энг яхши мураббийи деб топилди. Англиялик мутахассис қўл остида жамоа 3 ғалаба ва битта дуранг натижа қайд этди.

Ҳаудан ташқари энг яхши мураббий бўлиш учун Микель Артета («Арсенал», 3 ғалаба), Ралф Ҳазенҳюттл («Саутҳэмптон», 3 ғалаба ва битта дуранг) ва Юрген Клопп («Ливерпуль», 4 ғалаба) каби мураббийлар кураш олиб борганди.

Эслатиб ўтамиз, декабрь ойининг энг яхши мураббийи «шаҳарликлар» устози Пеп Гвардиола бўлган эди. Январь ойида эса «Вулверҳэмптон» устози Бруну Лаже ушбу эътирофга лойиқ кўрилганди.

«Ливерпуль» ҳимоячиси Жоэл Матип эса февраль якунларига кўра, ойнинг энг яхши футболчиси деб топилди. 31 ёшли ҳимоячи мерсисайдликлар сафида февраль ойида битта голли узатма ва битта гол муаллифига айланди.

Матипдан ташқари ушбу соврин учун Чи Адамс («Саутҳэмптон», 3 та гол ва битта голли узатма), Райан Фрэйзер («Ньюкасл», битта гол ва битта голли узатма), Ҳарри Кейн («Тоттенҳэм», 3 та гол ва битта голли узатма), Бен Ми («Бёрнли», битта гол) ва Уилфред Заҳа («Кристал Пэлас», 3 та гол) каби футболчилар даъвогар эди.

Декабрь ойида мазкур совринни «Манчестер Сити» вингери Раҳим Стерлинг, январда эса «Манчестер Юнайтед» посбони Давид де Хеа қўлга киритганди.