Ijtimoiy tarmoqlarda Samarqand viloyatida qiz o‘z onasini urayotgani aks etgan video tarqaldi. Samarqand viloyati IIB mazkur holatga munosabat bildirib, ona-bolaning shaxsiga aniqlik kiritilganini ma’lum qildi.
Videoda qiz o‘z onasining yoqasidan olgani va o‘qlov bilan urgani tasvirlangan. Holatni tasvirga olgan ayolning so‘zlariga ko‘ra, mojaro pul sabab kelib chiqqan.
Samarqand viloyati IIB matbuot kotibining yozishicha, videotasvirdagi holat 2022-yil 14-fevral kuni Samarqand shahar “Bog‘ibaland” MFYda hududida sodir bo‘lgan.
Samarqand shahar “Imom Vose” MFYda yashovchi 57 yoshli H.N. “Bog‘ibaland” MFYda yashovchi kenja qizi I.N.ning (1997-yilda tug‘ilgan) yashash uyiga kelib, u bilan o‘zaro uy-joy masalasida tortishib qolishi natijasida ona va bola o‘rtasida kelishmovchilik yuzaga kelgan.
Holat Samarqand shahri bo‘yicha IIO FMB 6-son IIB xodimlari tomonidan hujjatlashtirilib, hozirda tergovga qadar tekshiruv harakatlari olib borilmoqda.
Eslatib o‘tamiz, 2021-yilning avgustida Qashqadaryo hokimi qabulida bo‘lgan onaxon noma’lum sababga ko‘ra qizi tomonidan tahqirlangani aks etgan video tarqalgan edi. Keyinroq farzandidan tarsaki yegan 70 yoshli qashqadaryolik onaxonga himoya orderi berilgan, qiz esa nevrologik dispanserga tibbiy ko‘rik uchun yuborilgandi.
Izoh (0)