Buyuk Britaniya Ukrainada davom etayotgan urush sabab Rossiyaga qarshi qo‘shimcha sanksiyalar paketini joriy etmoqda. Bu haqda mamlakat hukumatining saytida ma’lum qilindi.
London oldinroq Rossiya samolyotlari parvoziga qo‘yilgan taqiqni kuchaytirgandi. Endilikda Rossiya bilan bog‘liq har qanday samolyot Buyuk Britaniya havo makoniga kirsa, jinoiy javobagarlikka tortiladi. Britaniya hukumati bu kabi havo kemalarini ushlab qolish imkoniyatiga ega bo‘ladi.
Bundan tashqari, Buyuk Britaniya Rossiyaga aviatsiya va kosmik mahsulot hamda texnologiyalarni eksport qilishni taqiqlagan.
“Biz Rossiya samolyotlarining parvozini birinchilardan bo‘lib taqiqlagan mamlakatmiz. Bugun yana davom etib, Buyuk Britaniya havo makonida parvozlarni amalga oshirish uchun jinoiy javobgarlik belgiladik”, — deydi mamlakat transport vaziri Grant Shepps.
Uning qo‘shimcha qilishicha, Britaniya rasmiylari “begunoh ukrainaliklar azob chekayotgan paytda Putin hamda uning tarafdorlarini oddiy hayot kechirish imkoniyatidan mahrum qilish” ustida ishlashni davom etadi.
24-fevral kuni urush boshlanganidan song, Rossiya samolyotlari uchun nafaqat Buyuk Britaniya, balki Yevropa Ittifoqi, AQSh va Kanada ham o‘z havo makonini yopdi. Rossiya bunga javoban G‘arb davlatlaridan kelgan samolyotlar uchun o‘z havo makonini yopdi.
Bundan tashqari, G‘arb Rossiyaga yangi samolyotlar yetkazib berish va amaldagi lizing sharnomalarini bekor qilishni nazarda tutuvchi taqiqlarni ham joriy etgan. Shu sababli Rossiya havo kemalarini chegaralarda ushlab turish boshlangan. Boeing esa Rossiya aviakompaniyalariga ehtiyot qismlar yetkazib berish va texnik xizmat ko‘rsatishni to‘xtatgan.
5-mart kuni “Rosaviatsiya” xorij kompaniyalari lizingi asosidagi samolyotlarga ega Rossiya aviatashuvchilariga xorijga barcha reyslarni to‘xtatishni tavsiya qildi. 8-martdan “Aeroflot” va “Pobeda” xalqaro reyslarnini to‘xtatdi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)