Буюк Британия Украинада давом этаётган уруш сабаб Россияга қарши қўшимча санкциялар пакетини жорий этмоқда. Бу ҳақда мамлакат ҳукуматининг сайтида маълум қилинди.
Лондон олдинроқ Россия самолётлари парвозига қўйилган тақиқни кучайтирганди. Эндиликда Россия билан боғлиқ ҳар қандай самолёт Буюк Британия ҳаво маконига кирса, жиноий жавобагарликка тортилади. Британия ҳукумати бу каби ҳаво кемаларини ушлаб қолиш имкониятига эга бўлади.
Бундан ташқари, Буюк Британия Россияга авиация ва космик маҳсулот ҳамда технологияларни экспорт қилишни тақиқлаган.
«Биз Россия самолётларининг парвозини биринчилардан бўлиб тақиқлаган мамлакатмиз. Бугун яна давом этиб, Буюк Британия ҳаво маконида парвозларни амалга ошириш учун жиноий жавобгарлик белгиладик», — дейди мамлакат транспорт вазири Грант Шеппс.
Унинг қўшимча қилишича, Британия расмийлари «бегуноҳ украиналиклар азоб чекаётган пайтда Путин ҳамда унинг тарафдорларини оддий ҳаёт кечириш имкониятидан маҳрум қилиш» устида ишлашни давом этади.
24 февраль куни уруш бошланганидан сонг, Россия самолётлари учун нафақат Буюк Британия, балки Европа Иттифоқи, АҚШ ва Канада ҳам ўз ҳаво маконини ёпди. Россия бунга жавобан Ғарб давлатларидан келган самолётлар учун ўз ҳаво маконини ёпди.
Бундан ташқари, Ғарб Россияга янги самолётлар етказиб бериш ва амалдаги лизинг шарномаларини бекор қилишни назарда тутувчи тақиқларни ҳам жорий этган. Шу сабабли Россия ҳаво кемаларини чегараларда ушлаб туриш бошланган. Boeing эса Россия авиакомпанияларига эҳтиёт қисмлар етказиб бериш ва техник хизмат кўрсатишни тўхтатган.
5 март куни «Росавиация» хориж компаниялари лизинги асосидаги самолётларга эга Россия авиаташувчиларига хорижга барча рейсларни тўхтатишни тавсия қилди. 8 мартдан «Аэрофлот» ва «Победа» халқаро рейсларнини тўхтатди.
Россия—Украина урушига оид тезкор, ишончли янгиликлар ва маълумотларни «Дарё»нинг Live саҳифаси орқали кузатиб боринг → @Daryo_Live
Изоҳ (0)