Bayden Rossiya nefti va gazining AQShga importini taqiqladi. Buyuk Britaniya 2022-yil oxirida Rossiya neftini rad qiladi

AQSh prezidenti Jo Bayden Rossiya nefti va gazining mamlakatga importini taqiqladi. Bu haqda Sky News xabar berdi.

Bayden o‘z bayonotida mazkur qarorning AQSh hamda uning ittifoqchilari bilan uzviy hamkorlikda qabul qilinganini ta’kidlagan. AQSh prezidentining so‘zlariga ko‘ra, Yevropa mamlakatlari Rossiyadan olinadigan energiya manbalaridan Vashington kabi voz kecha olmasligini qayd etgan.

Shuningdek, Bayden amerikalik iste’molchilarni mazkur qaror tufayli benzin narxining oshishi mumkinligidan ogohlantirdi.

Buyuk Britaniya bosh vaziri Boris Jonson ham Baydenning bayonotidan keyin Londonning Rossiya gazi va neftini import qilishni 2022-yil yakunida to‘xtatishini ma’lum qildi.

Avvalroq Kanadaning Rossiya neftini import qilishga nisbatan taqiqlar o‘rnatgani haqida xabar berilgandi.