Buyuk Britaniya Mudofaa vazirligi Birlashgan Qirollik harbiy xizmatchilariga ruxsatsiz Ukraina hududiga borishni taqiqladi, deb xabar beradi The Independent gazetasi.
“Barcha harbiy xizmatchilarga keyingi ko‘rsatma bo‘lmaguniga qadar Ukrainaga borish taqiqlanadi”, — deydi Mudofaa vazirligi vakili.
Mamlakat mudofaa idorasining bayonotida qayd etilishicha, Ukrainaga yo‘l olgan harbiy xizmatchilar intizomiy va ma’muriy javobgarlikka tortiladi. Mazkur qoida hozirda xizmatdan bo‘shatilgan xodimlarga ham taalluqli.
Buyuk Britaniya Mudofaa vazirligi oldin ham harbiy xizmatchilarini o‘zboshimchalik bilan Ukrainaga bormaslik haqida ogohlantirgan edi. Idora Britaniya askarlarining Ukrainada paydo bo‘lishi mojaroning yanada jiddiy tus olishiga olib kelishi va Rossiya tomonidan qattiq javob chorasi ko‘rilishi mumkinligidan xavotirda.
Avvalroq Buyuk Britaniya bosh vaziri Boris Jonson Ukrainadagi voqealar munosabati bilan Moskvaga bosimni kuchaytirish maqsadida reja ishlab chiqqani to‘g‘risida xabar berilgandi. Bosh vazir ofisiga ko‘ra, Moskva Ukrainaga qarshi harakatlarida “muvaffaqiyatsizlikka uchrashi va bu yaqqol ko‘rinib turishi kerak”, buning uchun esa Rossiyaga maksimal darajada zarar yetkazishga qaratilgan sa’y-harakatlarni kuchaytirish zarur.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)