Xorazmda pul evaziga yo‘l-transport hodisasi natijasida hech kimga shikast yetmagani to‘g‘risida hujjatlarni tayyorlab berishni va’da qilgan shifokor ushlandi, deb xabar beradi Bosh prokuratura huzuridagi departament.
Ma’lum qilinishicha, departamentning Yangiariq tuman bo‘limi tomonidan DXXning Xiva shahar bo‘limi bilan hamkorlikda tezkor tadbir o‘tkazilgan. Tadbirda Urganch TTB markaziy poliklinikasi shifokori A.S. fuqaro T.ning boshqaruvidagi avtotransport vositasida sodir bo‘lgan avtohalokat natijasida hech kimga shikast yetmagani bo‘yicha hujjatlarni uning foydasiga hal qilib berishni va’da qilgani aniqlangan. Shuningdek, u haydovchiga tekshiruv harakatlarini o‘tkazayotgan IIB tergovchisini javobgarlikka tortmaslikka ko‘ndirib berishini aytgan. Buning evaziga shifokor 1000 dollar olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda tadbirkorning noqonuniy faoliyat yuritishiga ruxsat berish evaziga undan oyiga 500 ming so‘mdan pul undirib kelgan soliqchi qo‘lga olingani, Chiroqchi tuman YHXB boshlig‘i 130 ming so‘m pora bilan ushlangani, Samarqandda 50 ming dollar evaziga DXXga ishga kiritib qo‘ymoqchi bo‘lgan shaxs qo‘lga olingani to‘g‘risida xabar berilgandi.
Mavzuga doir:
Izoh (0)