Oziq-ovqat narxlari fevral oyida rekord darajada ko‘tarildi — FAO

BMTning oziq-ovqat va qishloq xo‘jaligi tashkiloti (FAO) ma’lumotlariga ko‘ra, jahon oziq-ovqat narxlarining ko‘rsatkichi fevral oyida ko‘tarilib, o‘simlik moylari va sut mahsulotlari bo‘yicha rekord darajaga yetdi.

FAO oziq-ovqat narxlari indeksi fevral oyida o‘rtacha 140,7 punktni tashkil etdi. Bu yanvar oyiga nisbatan 3,9 foizga, o‘tgan yilning shu oyiga nisbatan esa 20,7 foizga yuqori. FAO indeksi oziq-ovqat mahsulotlarining xalqaro narxlari bilan bo‘ladigan oylik o‘zgarishlarni kuzatib boradi.

Sut mahsulotlari esa fevralda yanvar oyiga nisbatan o‘rtacha 6,4 foizga yuqori bo‘ldi. Bu G‘arbiy Yevropa va Okeaniyada sut yetkazib berishning kutilganidan pastligi va doimiy import talabi bilan bog‘liqligi aytilmoqda.

Dunyo bo‘ylab go‘sht narxlari yanvarga qarganda 1,1 foizga o‘sdi. Mol go‘shti kotirovkalari kuchli global import talabi, Braziliyada so‘yishga tayyor qoramollarning cheklangan ta’minoti va Avstraliyada qo‘yilgan cheklovlar sababli yangi rekord darajaga yetdi. 

Shakar narxlari Hindiston va Tailand kabi yirik eksport qiluvchi mamlakatlarda ishlab chiqarish oshayotganligi tufayli 1,9 foizga kamaydi. Fevral oyidagi narxlarning o‘sishi qisman Ukrainadagi urush bilan ham bo‘gliq bo‘ldi. Qayd etilishicha, Jahon bug‘doy va makkajo‘xori ishlab chiqarish hajmi 2022-yilda o‘sadi.

2021—2022-yillarda global dondan foydalanish hozirda 2,8 mln tonnani tashkil etadi. Bu yillik 1,5 foizga o‘sishdir. 2022-yilda tugaydigan global don zaxiralari yil davomida bir oz o‘sib, 836 mln tonnagacha yetishi kutilmoqda. 

O‘zbekistonda ahvol qanday?

Ketma-ket ikkinchi oy meva-sabzavotlar narx oshishi bo‘yicha yetakchilik qildi. Yanvar oyiga nisbatan meva va yong‘oqlar narxlari 2 foizga oshgan bo‘lsa, baliq va boshqa dengiz mahsulotlari 0,3 foizga qimmatlashdi. 

Sabzavotlar va dukkaklilar narxi 2,1 foizga ko‘tarilgan. Go‘sht va go‘sht mahsulotlari esa aksincha fevral oy davomida 0,1 foizga arzonlashdi. Narxlarning pasayishi yog‘-moy mahsulotlarida ham qayd etildi — 0,2 foizga. Sut mahsulotlari va tuxumning narxi ham 0,1 foizga tushdi.

O‘tgan yilning fevraliga nisbatan narxlarning o‘sish sur’ati quyidagicha bo‘ldi:

• go‘sht mahsulotlari — 9,6 foiz;
• donli ekinlar va yorma mahsulotlari — 7,5 foiz;
• baliq va boshqa dengiz mahsulotlari — 11,8 foiz;
• sut mahsulotalri va tuxum — 9,6 foiz;
• yog‘lar va moylar — 23 foiz;
• mevalar va yong‘oqlar — 14,7 foiz.