Xalqaro kongress markazida Prezident Shavkat Mirziyoyev ishtirokida 8-mart — Xalqaro xotin-qizlar kuni munosabati bilan tantanali bayram tadbiri bo‘lib o‘tmoqda, deb xabar bermoqda “Daryo” muxbiri.
Shavkat Mirziyoyev O‘zbekistonda ayollarni ijtimoiy himoya qilish bo‘yicha yondashuvlar ham tubdan qayta ko‘rib chiqilishini ma’lum qildi.
Jumladan, ehtiyojmand ayollarga zarur sharoitlar yaratish, xotin-qizlar salomatligini tiklash va muhofaza qilish, ayniqsa, qishloq joylarda yashaydigan ayollarning kasb-hunar egallashiga ko‘maklashish, bandligini ta’minlash, tadbirkorlikka jalb qilish bo‘yicha muhim tadbirlar amalga oshiriladi.
“Mamlakatimizda tadbirkorlik sohasida ishlayotgan xotin-qizlar sonini yanada ko‘paytirish maqsadida “Bizneschi ayollar” dasturi qabul qilinib, uning doirasida 8 trillion so‘m mablag‘ yo‘naltiriladi. Shuningdek, joriy yilda Ipoteka kreditlari bo‘yicha beriladigan subsidiyalarning 40 foizi xotin-qizlar uchun ajratiladi. Bu muhtoj ayollarni 12 mingta qulay uy-joy bilan ta’minlash imkoniyatini beradi”, — deydi prezident.
Shavkat Mirziyoyev “tariximizda ilgari bo‘lmagan bunday keng ko‘lamli ishlar ijrosi uchun 15 trillion so‘m mablag‘ yo‘naltirilishini” aytib o‘tdi.
“Barcha hududlarimizda jamoatchilikka, avvalo, yoshlarga tarbiyaviy ta’sir ko‘rsata oladigan, obro‘-e’tiborli ayollarni o‘z safida birlashtirgan “Oqila ayollar” harakatini sizlar bilan birga tashkil etsak, bu ezgu harakat tom ma’noda jamiyatimiz ovoziga, mahalla vijdoniga aylanadi, deb o‘ylayman”, — deydi Shavkat Mirziyoyev.
Izoh (0)