“PSJ” hujumchisi Kilian Mbappe jarohat oldi. Bu haqda RMC Sport xabar bermoqda.
Qayd etilishicha, 23 yoshli Mbappe 7-mart, dushanba kuni mashg‘ulot paytida jamoadoshi bilan to‘qnashib ketganidan keyin jarohat olgan. Futbolchi yaqin orada tibbiy ko‘rikdan o‘tadi va shundan so‘ng uning Chempionlar Ligasi 1/8 final javob uchrashuvidan o‘rin olgan “Real”ga qarshi o‘yinda maydonga tushishi yoki aksincha ekanligi aniq bo‘ladi.
Eslatib o‘tamiz, Mbappe ispan klubiga qarshi birinchi o‘yinda jamoasining g‘alaba goliga mualliflik qildi.
“Real” – “PSJ” o‘rtasidagi javob bellashuvi 9-mart kuni bo‘lib o‘tadi.
Ma’lumot uchun, 2021/22-yilgi mavsumda Mbappe barcha musobaqalarda 34 ta o‘yinda ishtirok etib, 24 ta gol va 17 ta golli uzatma muallifiga aylangan.
23 yoshli Mbappe 2017-yilda “Monako”dan “PSJ”ga ijara asosida o‘tgan edi. 2018-yilda parijliklar 145 million yevroga futbolchini to‘liq sotib olgan. Mbappening “PSJ” bilan amaldagi shartnomasi 2022-yil yozida o‘z nihoyasiga yetadi. Avvalroq bir necha marotaba hujumchining “Real”ga o‘tishi haqida xabarlar yangragandi.
Izoh (0)