“Manchester Yunayted” hujumchisi Krishtianu Ronaldu jarohati sababli APL doirasida “Manchester Siti”ga qarshi kechgan bahsni o‘tkazib yubordi.
The Athletic’ning xabariga ko‘ra, Ronaldu “shaharliklar”ga qarshi o‘yinda maydonga tusha olmasligini bilgach, Portugaliyaga uchib ketgan. U sonidagi jarohat sabab qaydnomaga kiritilmagandi.
Krishtianuning vataniga ketishi mankunianliklarning boshqa futbolchilarini hayratga solgan. Jarohat olgan futbolchilar o‘yin payti tribunada bo‘lishi shart emas, ammo jamoadoshlari Ronalduning aurasi va klubga qo‘shgan hissasini hisobga olganda, derbida uning stadionda bo‘lishini kutgandi.
“Manchester Yunayted” bosh murabbiyi Ralf Rangnik Ronaldu bilan bog‘liq vaziyatga munosabat bildirdi.
“Shifokorlarning so‘zlariga ishonish lozim. Juma kuni ertalab, mashg‘ulotlardan avval shifokor yonimga keldi va Krishtianu soni bilan bog‘liq muammolar tufayli shug‘ullana olmasligini aytdi. Shanba kuni ham shu hol takrorlandi.
Futbolchilar jarohat olgan bo‘lsa, shifokor yoki tibbiy bo‘limga o‘ynay olmasligini aytadi. Men esa murabbiy sifatida buni qabul qilishim kerak.
Agar futbolchi o‘zida jarohat bor deb hisoblasa, men uni maydonga tushishga majburlay olmayman”, — deydi murabbiy.
“Manchester Yunayted” Angliya Premyer Ligasining 28-turida “Manchester Siti”ga 1:4 hisobida imkoniyatni boy berdi. Mankunianliklar 47 ochko bilan musobaqa jadvalida 5-o‘rinni egallab turibdi.
Izoh (0)