Килиан Мбаппе жароҳат олди. У «Реал»га қарши жавоб ўйинини ўтказиб юбориши мумкин

«ПСЖ» ҳужумчиси Килиан Мбаппе жароҳат олди. Бу ҳақда RMC Sport хабар бермоқда.

Қайд этилишича, 23 ёшли Мбаппе 7 март, душанба куни машғулот пайтида жамоадоши билан тўқнашиб кетганидан кейин жароҳат олган. Футболчи яқин орада тиббий кўрикдан ўтади ва шундан сўнг унинг Чемпионлар Лигаси 1/8 финал жавоб учрашувидан ўрин олган «Реал»га қарши ўйинда майдонга тушиши ёки аксинча эканлиги аниқ бўлади.

Эслатиб ўтамиз, Мбаппе испан клубига қарши биринчи ўйинда жамоасининг ғалаба голига муаллифлик қилди.

«Реал» – «ПСЖ» ўртасидаги жавоб беллашуви 9 март куни бўлиб ўтади.

Маълумот учун, 2021/22 йилги мавсумда Мбаппе барча мусобақаларда 34 та ўйинда иштирок этиб, 24 та гол ва 17 та голли узатма муаллифига айланган.

23 ёшли Мбаппе 2017 йилда «Монако»дан «ПСЖ»га ижара асосида ўтган эди. 2018 йилда парижликлар 145 миллион еврога футболчини тўлиқ сотиб олган. Мбаппенинг «ПСЖ» билан амалдаги шартномаси 2022 йил ёзида ўз ниҳоясига етади. Аввалроқ бир неча маротаба ҳужумчининг «Реал»га ўтиши ҳақида хабарлар янграганди.