Kevin de Bryuyne APLda 50 ta gol urdi. Belgiyaliklardan faqat uch futbolchi undan oldinda

“Manchester Siti” yarim himoyachisi Kevin de Bryuyne APLda o‘ziga xos natija qayd etdi.

Belgiyalik futbolchi derbida dublni rasmiylashtirdi. “Manchester Yunayted” darvozasiga kiritilgan birinchi to‘p Kevin uchun Angliya Premyer Ligasidagi 50-gol bo‘ldi va de Bryuyne APLda ushbu natijani qayd etgan to‘rtinchi belgiyalik futbolchiga aylandi.

Avvalroq Romelu Lukaku, Eden Azar va Kristian Benteke APLda 50 va undan ortiq gol urgandi.

Undan tashqari belgiyalik futbolchi uchrashuvda “Manchester Yunayted”ning barcha futbolchilaridan ko‘proq darvozaga zarba berdi. Mankunianliklar 5 marta darvozaga zarba bergan bo‘lsa, de Bryuynening o‘zi raqib darvozasiga 6 marta zarba yo‘llagan. Aniq zarbalar bo‘yicha esa 4:2 hisobi bilan “shaharliklar” vakili oldinda.

APLning 28-turidan o‘rin olgan Manchester derbisida “Manchester Siti” 4:1 hisobida g‘alaba qozondi. Ushbu g‘alabadan keyin Pep Gvardiola shogirdlari ochkolarini 69 taga yetkazib olgan holda peshqadamlikda davom etmoqda. “Manchester Yunayted” esa 47 ochko bilan 5-pog‘onada qoldi.