Diskvalifikatsiya muddatini o‘tayotgan Joze Mourinyo “Roma”ning o‘yinini klub avtobusida kuzatdi (foto)

Portugaliyalik mutaxassis “Roma”ning “Spetsiya”ga qarshi (1:0) o‘yinini avtobusda kuzatib bordi.

“Verona”ga qarshi o‘yinda hakamga baqirgani uchun 2 o‘yinga diskvalifikatsiya qilingan Mourinyo “Spetsiya”ga qarshi bahsni “Alberto Pikko” stadioni qarshisida turgan klub avtobusida tomosha qildi.

59 yoshli murabbiy stadionda bo‘lmasa-da, telefon orqali yordamchilariga kerakli ko‘rsatmalarni berib turdi.

O‘yindan so‘ng “Roma” jamoasi darvozabonlar murabbiyi Nunu Santush ijtimoiy tarmoqdagi sahifasiga rasm joyladi va unga: “Qamoqxonada iPad TV bor edi”, deya izoh qoldirdi. Jozening o‘zi esa Instagram storisiga rimliklar sport direktori Tiagu Pintu (u ham diskvalifikatsiya muddatini o‘tayapti) bilan birga tushgan suratini joyladi.

“Roma” “Spetsiya”ga qarshi o‘yinning so‘nggi daqiqalarida Temmi Abrahamning penaltidan urgan goli evaziga g‘alaba qozondi.

Rimliklar A Seriyada 27-turdan so‘ng 44 ochko bilan 6-o‘rinda bormoqda.