Stranja—2022. O‘zbekistonlik bokschilar umumjamoa hisobida birinchi o‘rinni egalladi

Bolgariya poytaxti Sofiya shahrida 22—27-fevral kunlari boks bo‘yicha nufuzli Stranja—2022 xalqaro turniri bo‘lib o‘tdi. Mazkur turnir o‘z tarixida 73-marotaba tashkil etildi. Unda jahonning 37 mamlakatidan 370 nafardan ortiq erkak va ayol bokschi ishtirok etdi.

Musobaqada qatnashgan o‘zbekistonlik bokschilar 6 ta oltin va bitta bronza medalni qo‘lga kiritdi. Umumjamoa hisobida o‘zbekistonlik sportchilar birinchi o‘rinni egalladi. Rossiya terma jamoasi esa 5 ta oltin bilan ikkinchi o‘rindan joy oldi (2 ta erkaklar, 3 ta ayollar). Kuchli uchlikka esa Qozog‘iston terma jamoasi 4 ta oltin medal bilan yakun yasadi (2 ta erkaklar, 2 ta ayollar).

2021-yilda bo‘lib o‘tgan Stranja xalqaro turnirida Bolgariya 8 ta medal bilan birinchi o‘rinni egallagan. O‘zbekiston, Ukraina va Qozog‘iston 6 ta medal bilan ikkinchi o‘rinni bo‘lishib olgandi.