24-fevral kuni Shavkat Mirziyoyev Qoraqalpog‘iston Respublikasining Beruniy tumanidagi Qorao‘zak shamol elektr stansiyasi (quvvati 100 MVt bo‘lgan) qurilishini boshlash uchun tamal toshini qo‘ydi, deb xabar bermoqda “Daryo” muxbiri.
Ushbu stansiya Yevropa tiklanish va taraqqiyot bankining texnik ko‘magida e’lon qilingan xalqaro tenderda Saudiya Arabistonining ACWA Power kompaniyasi 1 kilovatt soat elektr energiyasi uchun 2,5695 sent tarif taklifi bilan g‘olib deb topilgan. Shunga ko‘ra, ACWA Power kompaniyasi Qorao‘zak tumanida 100 MVt quvvatli yangi shamol elektr stansiyasini quradi.
Mazkur elektr stansiya 2 yil ichida, ya’ni 2024-yilda ishga tushiriladi.
Elektr stansiya ishga tushgach yiliga 350 million kilovatt-soat elektr energiyasi ishlab chiqarib, 120 mingdan ortiq xonadonni elektr energiyasi bilan ta’minlaydi.
Ahamiyatlisi, stansiya ishga tushirilishi natijasida yiliga 106 million kub metr tabiiy gaz tejalishiga erishiladi hamda atmosferaga 160 ming tonna zararli chiqindilarning chiqishini oldi olinadi. Ushbu hajmdagi tejalgan gaz bilan 35 mingta xonadonni 1 yil davomida tabiiy gaz bilan ta’minlash mumkin.
Shuni alohida ta’kidlash kerakki, qurilish davomida 400 nafar ishchi-xodimlar faoliyat yuritadi va stansiya ishga tushgach, 30 ta yangi o‘rni yaratiladi.
Loyiha qiymati 108 million dollarni tashkil etib, davlat-xususiy sheriklik tamoyillari asosida yuz foiz investor tomonidan moliyalashtiriladi.
Ma’lumot uchun, ACWA Power kompaniyasi O‘zbekistonda umumiy quvvati 2 600 MVt bo‘lgan issiqlik va shamol elektr stansiyalari quradi.
Xususan, Buxoro viloyatining Peshku va G‘ijduvon tumanlarida har birining quvvati 500 MVtdan bo‘lgan 2 ta shamol elektr stansiyasi qurilib, 2024-yilning yanvar oyida ishga tushiriladi.
Shu bilan birga, kompaniya tomonidan Sirdaryo viloyatining Shirin shahrida quvvati 1 500 MVt bo‘lgan issiqlik elektr stansiyasi qurilmoqda va stansiya 2023-yilning to‘rtinchi choragida ishga tushiriladi.
Eslatib o‘tamiz, davlat rahbari hududlar rivoji va aholi hayoti bilan tanishish maqsadida 23-fevraldan buyon Qoraqalpog‘istonda bo‘lib turibdi. Tashrif uch kun davom etishi rejalashtirilgan.
Izoh (0)