Shavkat Mirziyoyev 24-fevral kuni Qoraqalpog‘istonning Beruniy tumanida faollar bilan uchrashuvda dunyo kun sayin emas, soat sayin tahlikali bo‘lib borayotganini ta’kidladi, deb xabar bermoqda “Daryo” muxbiri.
“Biz iqtisodiyotimiz, mudofaamizni mustahkam qilib, ishonch bilan jonajon vatanimizning qudratini ko‘tarishga harakat qilishimiz kerak”, — dedi prezident.
“Kecha Mo‘ynoqda faollar bilan uchrashib, suhbatlashdim. Bundan tashqari, Taxtako‘pir tumaniga bordim. U yerning aholisi ham ‘qilsa bo‘lar ekanku, bizga ham sharoit yaratilsa bo‘larkanku’, deyishdi. Kecha, shuningdek, Shumanay tumanida ham bo‘ldik. Qoraqalpog‘istonning yeri bu yerdagi ikki million aholini bemalol boqadi. Faqat buning uchun har bir ishga ilm bilan yondoshishimiz kerak. Hokim yordamchilari ham, yoshlar yetakchilari bilan ham gaplashdim. Ularning ko‘zi yonib turibdi, ular ishlamoqchi. Agar biz avvalgidek qog‘ozbozchilik qilsak yaxshi ish ketmaydi”, — deya ta’kidlagan prezident.
Davlat rahbari mazkur loyihaga Qoraqalpog‘istonning havosi ham foyda berishi aniqligini aytgan.
“Necha yillar davomida bu yer energetika tanqisligini boshdan kechiryapti. Nega biz bunga ko‘p e’tibor beryapmiz? Agar biz katta korxonalar qurmoqchi bo‘lsak, keladigan investor ham ‘infratuzilmang bormi, gazing, suving, yo‘ling, temiryo‘ling, aeroporting bormi deb so‘raydi. Korrupsiya bo‘lmaydimi, deb savol beradi’ ”, — deydi Shavkat Mirziyoyev.
Avvalroq Shavkat Mirziyoyev Qoraqalpog‘istondagi “Beltov” ovulini borib ko‘rgani, “Shumanay ekoteks” korxonasi faoliyati bilan tanishgani, Shavkat Mirziyoyev Orol dengizining qurigan tubini ko‘zdan kechirgani to‘g‘risida xabar berilgandi.
Izoh (0)