24 февраль куни Шавкат Мирзиёев Қорақалпоғистон Республикасининг Беруний туманидаги Қораўзак шамол электр станцияси (қуввати 100 МВт бўлган) қурилишини бошлаш учун тамал тошини қўйди, деб хабар бермоқда «Дарё» мухбири.
Ушбу станция Европа тикланиш ва тараққиёт банкининг техник кўмагида эълон қилинган халқаро тендерда Саудия Арабистонининг ACWA Power компанияси 1 киловатт соат электр энергияси учун 2,5695 сент тариф таклифи билан ғолиб деб топилган. Шунга кўра, ACWA Power компанияси Қораўзак туманида 100 МВт қувватли янги шамол электр станциясини қуради.
Мазкур электр станция 2 йил ичида, яъни 2024 йилда ишга туширилади.
Электр станция ишга тушгач йилига 350 миллион киловатт-соат электр энергияси ишлаб чиқариб, 120 мингдан ортиқ хонадонни электр энергияси билан таъминлайди.
Аҳамиятлиси, станция ишга туширилиши натижасида йилига 106 миллион куб метр табиий газ тежалишига эришилади ҳамда атмосферага 160 минг тонна зарарли чиқиндиларнинг чиқишини олди олинади. Ушбу ҳажмдаги тежалган газ билан 35 мингта хонадонни 1 йил давомида табиий газ билан таъминлаш мумкин.
Шуни алоҳида таъкидлаш керакки, қурилиш давомида 400 нафар ишчи-ходимлар фаолият юритади ва станция ишга тушгач, 30 та янги ўрни яратилади.
Лойиҳа қиймати 108 миллион долларни ташкил этиб, давлат-хусусий шериклик тамойиллари асосида юз фоиз инвестор томонидан молиялаштирилади.
Маълумот учун, ACWA Power компанияси Ўзбекистонда умумий қуввати 2 600 МВт бўлган иссиқлик ва шамол электр станциялари қуради.
Хусусан, Бухоро вилоятининг Пешку ва Ғиждувон туманларида ҳар бирининг қуввати 500 МВтдан бўлган 2 та шамол электр станцияси қурилиб, 2024 йилнинг январь ойида ишга туширилади.
Шу билан бирга, компания томонидан Сирдарё вилоятининг Ширин шаҳрида қуввати 1 500 МВт бўлган иссиқлик электр станцияси қурилмоқда ва станция 2023 йилнинг тўртинчи чорагида ишга туширилади.
Эслатиб ўтамиз, давлат раҳбари ҳудудлар ривожи ва аҳоли ҳаёти билан танишиш мақсадида 23 февралдан буён Қорақалпоғистонда бўлиб турибди. Ташриф уч кун давом этиши режалаштирилган.
Изоҳ (0)