Rossiya tarixni qaytadan yozish uchun kuch ishlatish yo‘lidan bormoqda. NATO bosh kotibi Yens Stoltenberg bu haqda o‘z mulohazalarini bildirdi. U Moskvani zudlik bilan Ukrainadagi qurolli harakatlarni to‘xtatishga va u yerdan harbiy qo‘shinni olib chiqib ketishga chaqirdi. Bu haqda “RBK” xabar berdi.
“Rossiya tarixni qaytadan yozish uchun zo‘ravonlik yo‘liga o‘tdi”, — deya fikr bildirgan Stoltenberg. Shuningdek, u NATOga a’zo mamlakatlarga yordam berilishini va’da qilgan.
“Bittamizga hujum qilish hammamizga urush ochishni anglatadi”, — deya ta’kidlagan tashkilot bosh kotibi.
Stoltenbergning so‘zlariga ko‘ra, blok sharqiy qanotdagi faolligini oshirmoqda va mudofaa rejalarini bajarishni boshlagan. 100 dan ziyod samolyotlar jangovar holatda alyans havo chegaralarini himoya qilishga tayyor turibdi.
Shuningdek, NATO bosh kotibi Rossiyaning harbiy operatsiyalarni boshlashi alyans uchun kutilmagan harakat bo‘lmaganini, blokning bir necha oydan buyon Rossiya hujumi bo‘lishi haqida ogohlantirib kelganini qayd etdi. U Kremlning maqsadi o‘z ta’sir doirasini qayta tiklashdan iborat deb hisoblashini aytdi.
“Biz Rossiyani hujumdan qaytarishga urindik, barchasini diplomatik yo‘l bilan hal etishga chaqirib, iqtisodiy oqibatlar yomon bo‘lishi haqida tahdidlar qildik. Rossiya ogohlantirishlarga parvo ham qilmay, baribir ushbu yo‘ldan bordi”, — deydi Stoltenberg.
U yana bir marta NATOning urush ishtirokchisiga aylanishni istamasligini, balki aksincha qurolli to‘qnashuvlarning oldini olish uchun harakat qilishini ta’kidladi, Moskvaning diplomatik chora-tadbirlarga jiddiy munosabatda bo‘lmagani, muammoni muzokaralar yo‘li bilan hal etish uchun “eshiklarni yopganini” va NATO bundan afsusda ekanini bildirdi.
Stoltenberg Moskva harakatlari uchun qimmat tovon to‘lashi, javob berishini, unga nisbatan sanksiyalar qo‘llanishini, Ukrainaga esa harbiy-texnik yordam ko‘rsatilishini takrorlab o‘tdi.
Vaziyatga NATO aralashadigan bo‘lsa, Rossiyadan berilishi mumkin bo‘lgan hujum to‘g‘risidagi savolga quyidagicha javob qaytardi:
“Prezident Putinning ritorikasi va Rossiyaning zo‘ravonligi — xavfsizlik borasida yangi hayot haqiqati kuzatilayotgani haqida gapirishimizga sabab bo‘lmoqda”.
Putin Rossiya fuqarolariga yo‘llagan murojaatida voqea-hodisalarga aralashmoqchi bo‘lgan, fuqarolar va mamlakat xavfsizligiga tahdid qiluvchi har qanday raqibga zudlik bilan keskin javob qaytarilishi haqida gapirgan. U bu kabi aralashuvlarni qilmoqchi bo‘lganlarga hali tarixda kuzatilmagan oqibatlar kutib turgani xususida ogohlantirgan.
NATO bosh kotibi 25-fevralda alyansning sammitini o‘tkazadi va unda tashkilotga a’zo mamlakatlar Rossiyaga nisbatan keyingi harakatlarni muhokama qiladi.
24-fevralga o‘tar kechasi Rossiya prezidenti Vladimir Putin Donbassda “mintaqa aholisini genotsiddan himoya qilish” uchun “maxsus harbiy operatsiya” boshlanganini ma’lum qildi. Murojaatdan so‘ng ijtimoiy tarmoqlarda Ukrainaning ko‘plab shaharlarida portlashlar sodir bo‘lgani haqida xabarlar paydo bo‘ldi. Ukraina Ichki ishlar vazirligi rahbari maslahatchisi Anton Gerashchenko 24-fevral kuni erta tongda Kiyev, Xarkov va Dneprda harbiy infratuzilma obyektlariga raketa zarbalari berilganini ma’lum qildi.
Ukraina prezidenti Vladimir Zelenskiy Putinning harakatini mamlakatni yakson qilish deya baholab, G‘arbni “Putinga qarshi koalitsiya” tuzishga chaqirdi.
Rossiya Mudofaa vazirligi esa “Ukraina harbiy infratuzilmasi ishdan chiqarilayotganini”, mamlakatning tinch aholisiga hech qanday tahdid yo‘qligini e’lon qilgan. Ukraina ichki ishlar vazirining maslahatchisi Anton Gerashenko esa Odessa va Sumsk viloyatlarida, shuningdek, Mariupol shahridagi otishmalar oqibatida halok bo‘lganlar to‘g‘risida ma’lumot berdi.
Izoh (0)