Yevropa Ittifoqining DXR va LXR mustaqilligini tan olgani uchun Rossiyaga qarshi joriy etgan sanksiyalari kuchga kirdi. Sanksiyalar qo‘llangan rossiyaliklarning to‘liq ro‘yxati 23-fevral kuni ittifoq jurnalida e’lon qilingan.
Cheklov choralariga ko‘ra, Rossiyaning 22 nafar fuqarosiga Yevropa Ittifoqi mamlakatlari hududiga kirish taqiqlanadi va ularning aktivlari muzlatiladi. Ular orasida Rossiya mudofaa vaziri Sergey Shoygu, TIV rasmiy vakili Mariya Zaxarova, prezident administratsiyasi rahbari Anton Vayno, Rossiya Kommunistik partiyasi rahbari Gennadiy Zyuganov, shuningdek, Rossiya Davlat dumasi vitse-spikeri Pyotr Tolstoy, RT telekanali rahbari Margarita Simonyan va teleboshlovchi Vladimir Solovyov bor.
Bundan tashqari, Yevropa Ittifoqi hujjatida yuridik shaxslar ham keltirib o‘tilgan. Ular orasida “Rossiya”, “PSB” banklari, “VEB.RF” Rossiya davlat taraqqiyot korporatsiyasi, shuningdek, matbuotda “trollar fabrikasi” sifatida tanilgan Internet tadqiqotlari agentligi mavjud.
Yevropa Ittifoqidan tashqari Rossiyaga qarshi sanksiyalarni Buyuk Britaniya, Avstraliya, Kanada va Yaponiya ham joriy etdi. Bayden DXR va LXR mustaqilligini tan olgan Rossiyaga qarshi sanksiyalar e’lon qildi.
Rossiya prezidenti Vladimir Putin 21-fevral kuni Xavfsizlik kengashi yig‘ilishida DXR va LXR mustaqilligini e’lon qilish taklif etilganidan keyin, mamlakat fuqarolariga murojaat yo‘lladi va respublikalarning mustaqilligini tan olish haqidagi farmonni imzoladi. 22-fevral kuni Rossiya davlat dumasi va federatsiya kengashi ushbu farmonni ratifikatsiya qildi.
Mavzuga doir:
Izoh (0)