Россия тарихни қайтадан ёзиш учун куч ишлатиш йўлидан бормоқда. НАТО бош котиби Йенс Столтенберг бу ҳақда ўз мулоҳазаларини билдирди. У Москвани зудлик билан Украинадаги қуролли ҳаракатларни тўхтатишга ва у ердан ҳарбий қўшинни олиб чиқиб кетишга чақирди. Бу ҳақда «РБК» хабар берди.
«Россия тарихни қайтадан ёзиш учун зўравонлик йўлига ўтди», — дея фикр билдирган Столтенберг. Шунингдек, у НАТОга аъзо мамлакатларга ёрдам берилишини ваъда қилган.
«Биттамизга ҳужум қилиш ҳаммамизга уруш очишни англатади», — дея таъкидлаган ташкилот бош котиби.
Столтенбергнинг сўзларига кўра, блок шарқий қанотдаги фаоллигини оширмоқда ва мудофаа режаларини бажаришни бошлаган. 100 дан зиёд самолётлар жанговар ҳолатда альянс ҳаво чегараларини ҳимоя қилишга тайёр турибди.
Шунингдек, НАТО бош котиби Россиянинг ҳарбий операцияларни бошлаши альянс учун кутилмаган ҳаракат бўлмаганини, блокнинг бир неча ойдан буён Россия ҳужуми бўлиши ҳақида огоҳлантириб келганини қайд этди. У Кремлнинг мақсади ўз таъсир доирасини қайта тиклашдан иборат деб ҳисоблашини айтди.
«Биз Россияни ҳужумдан қайтаришга уриндик, барчасини дипломатик йўл билан ҳал этишга чақириб, иқтисодий оқибатлар ёмон бўлиши ҳақида таҳдидлар қилдик. Россия огоҳлантиришларга парво ҳам қилмай, барибир ушбу йўлдан борди», — дейди Столтенберг.
У яна бир марта НАТОнинг уруш иштирокчисига айланишни истамаслигини, балки аксинча қуролли тўқнашувларнинг олдини олиш учун ҳаракат қилишини таъкидлади, Москванинг дипломатик чора-тадбирларга жиддий муносабатда бўлмагани, муаммони музокаралар йўли билан ҳал этиш учун «эшикларни ёпганини» ва НАТО бундан афсусда эканини билдирди.
Столтенберг Москва ҳаракатлари учун қиммат товон тўлаши, жавоб беришини, унга нисбатан санкциялар қўлланишини, Украинага эса ҳарбий-техник ёрдам кўрсатилишини такрорлаб ўтди.
Вазиятга НАТО аралашадиган бўлса, Россиядан берилиши мумкин бўлган ҳужум тўғрисидаги саволга қуйидагича жавоб қайтарди:
«Президент Путиннинг риторикаси ва Россиянинг зўравонлиги — хавфсизлик борасида янги ҳаёт ҳақиқати кузатилаётгани ҳақида гапиришимизга сабаб бўлмоқда».
Путин Россия фуқароларига йўллаган мурожаатида воқеа-ҳодисаларга аралашмоқчи бўлган, фуқаролар ва мамлакат хавфсизлигига таҳдид қилувчи ҳар қандай рақибга зудлик билан кескин жавоб қайтарилиши ҳақида гапирган. У бу каби аралашувларни қилмоқчи бўлганларга ҳали тарихда кузатилмаган оқибатлар кутиб тургани хусусида огоҳлантирган.
НАТО бош котиби 25 февралда альянснинг саммитини ўтказади ва унда ташкилотга аъзо мамлакатлар Россияга нисбатан кейинги ҳаракатларни муҳокама қилади.
24 февралга ўтар кечаси Россия президенти Владимир Путин Донбассда «минтақа аҳолисини геноциддан ҳимоя қилиш» учун «махсус ҳарбий операция» бошланганини маълум қилди. Мурожаатдан сўнг ижтимоий тармоқларда Украинанинг кўплаб шаҳарларида портлашлар содир бўлгани ҳақида хабарлар пайдо бўлди. Украина Ички ишлар вазирлиги раҳбари маслаҳатчиси Антон Герашченко 24 февраль куни эрта тонгда Киев, Харков ва Днепрда ҳарбий инфратузилма объектларига ракета зарбалари берилганини маълум қилди.
Украина президенти Владимир Зеленский Путиннинг ҳаракатини мамлакатни яксон қилиш дея баҳолаб, Ғарбни «Путинга қарши коалиция» тузишга чақирди.
Россия Мудофаа вазирлиги эса «Украина ҳарбий инфратузилмаси ишдан чиқарилаётганини», мамлакатнинг тинч аҳолисига ҳеч қандай таҳдид йўқлигини эълон қилган. Украина ички ишлар вазирининг маслаҳатчиси Антон Герашенко эса Одесса ва Сумск вилоятларида, шунингдек, Мариупол шаҳридаги отишмалар оқибатида ҳалок бўлганлар тўғрисида маълумот берди.
Изоҳ (0)