Фарғона вилоятидаги метан заправкалар 24 соатлик иш режимига ўта бошлади, дея хабар берди «Дарё» мухбири.
Вилоятдаги метан заправкалар бугун, 21 февраль куни ҳам соат 15:00 да фаолиятини тўхтатган бўлса-да, соат 21:00 да яна фаолиятини давом эттирган.
«Тасодифан яна газ берилаётганини кўпчилик ҳайдовчилар билишмаса керак. Боиси газ заправкада ҳеч ким йўқ деярли. Ҳеч қандай муаммосиз газ олдик», — дейди «Дарё мухбири билан суҳбатлашган ҳайдовчиларнинг бири.
Вилоятнинг Олтиариқ, Риштон тумани, шунингдек, Фарғона шаҳрида бўлган «Дарё» мухбири аксарият заправкаларда ҳеч қандай навбат йўқлигини ёзмоқда.
«Аммо Фарғона шаҳридаги баъзи заправкалар ҳалиям иш бошлагани йўқ. Заправкалар олдида ҳалиям машиналар навбат кутишаётганини кўрдим. Менимча, ҳайдовчиларнинг аксарияти ҳали янгиликдан хабар топмаган кўринади», — дейди Фарғона шаҳрида яшовчи ҳайдовчилардан бири.
Эслатиб ўтамиз, аввалроқ «Дарё»да вилоятдаги метан заправкалар фаолиятида чеклов ўрнатилгани боис ҳайдовчилар сарсон бўлаётгани, ҳатто газ заправкаларда тунаб қолишга мажбур бўлаётгани маълум қилинганди.
Изоҳ (0)