Россияда баллистик ракеталарни учириш бўйича машғулот ўтказилади. Унга Путиннинг ўзи раҳбарлик қилади

19 февраль куни Россияда баллистик ва қанотли ракеталарни учириш бўйича ўқув машғулотлари ўтказилади. Стратегик кучларнинг машғулотларига Владимир Путин шахсан раҳбарлик қилади, деб ёзмоқда «РБК» Россия Мудофаа вазирлигига таяниб.

Машғулотлар ҳарбий бошқарув органлари, жанговар экипажлар, кемалар экипажлари ва ракета ташувчиларнинг тайёргарлигини, стратегик ядровий ва ноядровий кучлар қурол-яроғларининг ишончлилигини синовдан ўтказиш мақсадида олдиндан режалаштирилган, дейилади вазирлик хабарида.

Машғулотларда Аэрокосмик кучлар, Жанубий ҳарбий округ, Стратегик ракета қўшинлари, Шимолий ва Қора денгиз флотлари бўлинмалари иштирок этади.

Американинг Financial Times газетаси АҚШ Конгрессидаги манбага таяниб, Россия стратегик кучларининг машғулотлари икки ҳафтадан буён ортга сурилаётгани ҳақида ёзган.

Нашр суҳбатдошига кўра, Россия машғулот ўтказиш нияти ҳақида АҚШ Қуролли кучлари штаб бошлиқлари бирлашган қўмитаси раиси генерал Марк Милли ва Миллий разведка директори Эврил Хейнсга 3 февраль куни Вакиллар палатасида ўтказилган ёпиқ брифингда маълум қилган. Одатда бундай машғулотлар кузда бўлиб ўтади, аммо бу сафар Украина атрофидаги вазиятнинг кескинлашувини инобатга олиб, уларни февраль ойига кўчиришга қарор қилинган, дейди АҚШ ҳарбийлари.

Россия Мудофаа вазирлиги раҳбари Сергей Шойгу 2021 йилнинг декабрь ойида ҳам «Восток» ва «Гром» стратегик қўмондонлик-штаби ўқув машғулотлари ўтказилиши ҳақида гапирган аммо машғулотлар санасини айтмаган. Январь ойи бошида «ТАСС»нинг Мудофаа вазирлигига яқин манбаси улар йил бошида ўтказилишини айтган. Агентликнинг қайд этишича, ҳарбийлар одатда бундай машғулотларни йил охирига келиб ўтказади. Анъанага кўра, машғулотларда Камчаткадаги Кура полигонидан қитъалараро баллистик ракета учирилади.