Nukus davlat pedagogika institutining qurilish-ta’mirlashga ajratilgan puldan 12,7 mlrd so‘m talon-toroj qilinganiga aloqasi yo‘qligi ma’lum qilindi

Nukus davlat pedagogika institutiga qurish va ta’mirlash uchun ajratilgan qariyb 13 milliard so‘m talon-toroj qilingani to‘g‘risida xabar berilgandi. Oliy va o‘rta maxsus ta’lim vazirligi matbuot kotibi holatga munosabat bildirib, institutining qurilishdagi “o‘yinlarga” aloqasi yo‘qligini ma’lum qildi.

Ma’lum qilinishicha, 2018-2021-yillarda Nukus davlat pedagogika institutining o‘quv binolarini yangidan qurish va rekonstruksiya qilish uchun davlat budjetidan 54,3 milliard so‘m mablag‘ ajratilgan. Vazirlar Mahkamasining 2017-yil 7-noyabrdagi 1250-F-son farmoyishiga muvofiq, institutning 2000 o‘ringa mo‘ljallangan o‘quv binosini qurish uchun asosiy buyurtmachi qilib Qoraqalpog‘iston Respublikasi Vazirlar Kengashining “Yagona buyurtmachi xizmati” injiniring kompaniyasi, asosiy pudratchisi sifatida “Jayhun Universal Qurilish” MChJ, asosiy loyihachisi etib “Gorselproyekt” MChJ belgilangan.

Qurilish ishlari 2018-yilda asosiy pudratchi “Jayhun Universal Qurilish” MChJ tomonidan boshlanib, 2021-yil sentabr oyida yakuniga yetkazilishi kerak bo‘lgan. Biroq zarur mablag‘lar davlat budjetidan ajratilganiga qaramasdan, rejalashtirilgan ishlar belgilangan muddatda yakuniga yetmagan.

“Pudratchi ‘Jayhun Universal Qurilish’ MChJ va buyurtmachi Qoraqalpog‘iston Respublikasi Vazirlar Kengashining ‘Yagona buyurtmachi xizmati’ injiniring kompaniyasi mansabdor shaxslari o‘zaro til biriktirgan holda 12,7 milliard so‘m miqdoridagi pul mablag‘larini talon-toroj qilgan”, — deyiladi munosabatda.