Нукус давлат педагогика институтига қуриш ва таъмирлаш учун ажратилган қарийб 13 миллиард сўм талон-торож қилингани тўғрисида хабар берилганди. Олий ва ўрта махсус таълим вазирлиги матбуот котиби ҳолатга муносабат билдириб, институтининг қурилишдаги «ўйинларга» алоқаси йўқлигини маълум қилди.
Маълум қилинишича, 2018-2021 йилларда Нукус давлат педагогика институтининг ўқув биноларини янгидан қуриш ва реконструкция қилиш учун давлат бюджетидан 54,3 миллиард сўм маблағ ажратилган. Вазирлар Маҳкамасининг 2017 йил 7 ноябрдаги 1250-Ф-сон фармойишига мувофиқ, институтнинг 2000 ўринга мўлжалланган ўқув биносини қуриш учун асосий буюртмачи қилиб Қорақалпоғистон Республикаси Вазирлар Кенгашининг «Ягона буюртмачи хизмати» инжиниринг компанияси, асосий пудратчиси сифатида «Жайҳун Универсал Қурилиш» МЧЖ, асосий лойиҳачиси этиб «Горселпроект» МЧЖ белгиланган.
Қурилиш ишлари 2018 йилда асосий пудратчи «Жайҳун Универсал Қурилиш» МЧЖ томонидан бошланиб, 2021 йил сентябрь ойида якунига етказилиши керак бўлган. Бироқ зарур маблағлар давлат бюджетидан ажратилганига қарамасдан, режалаштирилган ишлар белгиланган муддатда якунига етмаган.
«Пудратчи ‘Жайҳун Универсал Қурилиш’ МЧЖ ва буюртмачи Қорақалпоғистон Республикаси Вазирлар Кенгашининг ‘Ягона буюртмачи хизмати’ инжиниринг компанияси мансабдор шахслари ўзаро тил бириктирган ҳолда 12,7 миллиард сўм миқдоридаги пул маблағларини талон-торож қилган», — дейилади муносабатда.
Мавзуга доир:
Изоҳ (0)