Sambo bo‘yicha jahon chempioni Kamoliddin Rasulov o‘limi yuzasidan bo‘lib o‘tayotgan sud majlisida marhumning ayblanuvchiga “Humo Trop” vitaminini sotgani, natijada ayblanuvchi sportchining sog‘lig‘i yomonlashib, o‘limiga sabab bo‘lishi mumkinligi haqidagi ma’lumotlarga aniqlik kiritildi. Bu haqda sud ishida qatnashgan “Daryo” muxbiri xabar berdi.
Sudda so‘z olgan guvohlardan biri A.Q.ning aytishicha, u ayblanuvchi va marhumni yaqindan tanigan. “Har ikkalovi bilan ham bir zalda mashg‘ulot o‘tardik”, — deydi u.
Guvoh so‘zlariga ko‘ra, Kamoliddin Rasulov ayblanuvchi Sh.T.ning so‘rovi bilan unga “Humo Trop” vitaminini shaxsan o‘zi olib kelib bergan. Sh.T. esa Kamoliddin Rasulovning tavsiyasiga ko‘ra, aytilgan dozadan ko‘proq vitamin qabul qilgan va shundan so‘ng tobi qochib qolgan.
“O‘sha vitamindan so‘ng o‘rtog‘imning issig‘i chiqib, kechasi uxlolmay chiqardi. Shaxsan o‘zim uni bir necha marotaba shifoxonalarga olib borganman. Shifokorlar uning yuragi sekin urayotganini, jigari kattalashganini aytishdi”, — deydi guvoh vitamin voqeasi haqida gapirar ekan.
Guvohga yuzlangan marhumning bevasi Gulnoza Xolmurodova: “Ayblanuvchining tobi qochishi aynan o‘sha vitamin bilan bog‘liqmi, shifokorlar aynan shu vitamin sabab uning yuragi sekin urayotgani-yu, jigari kattalashgan deyishdimi?”, deya savol berdi. Guvoh esa ayblanuvchi vitamin qabul qilgunga qadar sog‘lom va baquvvat bo‘lganini, sog‘lig‘ida hech qanday muammo bo‘lmaganini bildirdi.
Sud ishida 2022-yilning 25-fevral kuni soat 14:30 gacha tanaffus e’lon qilindi.
Eslatib o‘tamiz, o‘sha paytda sportchining o‘limi haqida jamoatchilikka axborot bergan Bosh prokuratura axborot xizmati ayblanuvchi Sh.T. tanishi, harbiy xizmatchi Kamoliddin Rasulovga qo‘ng‘iroq qilib, undan xarid qilib olgan “Humo Trop” vitaminini tavsiyasiga ko‘ra iste’mol qilgani natijasida sog‘lig‘i yomonlashganini, shifokorlar bu kasallikning davosi yo‘q deb aytgani xabar qilgandi.
Izoh (0)