Namangan hokimi Shavkat Abdurazzaqov viloyatda yo‘l harakati xavfsizligi bo‘yicha loyihalarni amalga oshirishga kirishgan turkiyalik investorlarni qabul qildi. Bu haqda “Daryo” muxbiri Azizbek Abduvaliyev xabar bermoqda.
ÜÇ NOKTA kompaniyasi Namanganda 10 million dollarlik investitsion loyihani amalga oshirmoqda. Bu bilan viloyatda yo‘l harakati qoidalarini buzganlikni foto-video qayd etish avtomatlashtirilgan tizimini tatbiq etish uchun amaliy qadamlar tashlandi. Tizim yo‘l-transport hodisalarining oldini olish, inson omilini cheklash, korrupsiyaning oldini olishga xizmat qilishi kutilmoqda.
Uchrashuv davomida yo‘l harakati xavfsizligi tizimida foydalanish uchun ishlab chiqarilgan “aqlli” radarlarning yangi avlodi namoyish qilindi. Lazer yordamida ishlovchi ushbu qurilmalarga qarshi turli antiradar uskunalar ish bermasligi, tizim esa faqat jazolash emas, balki yo‘llar va chorrahalardagi harakatni tartibga solishi qayd etildi.
Eslatib o‘tamiz, joriy yil 1-fevral kuni prezident huzurida o‘tkazilgan videoselektor yig‘ilishida Namangan shahrida 2021-yili 42 ta avariyada odamlar hayotdan ko‘z yumgani tanqid qilingandi. Shundan so‘ng Namangan viloyat IIB boshlig‘i ishdan olindi va o‘rniga yangi rahbar tayinlandi.
Izoh (0)