Buyuk Britaniya badavlat xorijliklarga kiritilgan investitsiya evaziga mamlakat fuqaroligini olish imkonini beruvchi “oltin vizalar”ni bekor qilishni rejalashtirmoqda. Bu haqda hukumatdagi manbasiga tayanib, Daily Mail xabar berdi.
Nashr manbasining ma’lum qilishicha, ichki ishlar vaziri Priti Patel keyingi hafta bundan 13 yil oldin leyboristlar tomonidan Buyuk Britaniyaga investitsiya jalb qilish uchun joriy etilgan “oltin vizalar” berish zudlik bilan to‘xtatilishini e’lon qiladi.
Ushbu dastur qoidalariga ko‘ra, 2 million funt sterling miqdorida sarmoya kiritgan shaxslar Buyuk Britaniyada uch yil yashash huquqiga ega bo‘ladi va keyinchalik uni ikki yilga uzaytirishi ham mumkin.
Manbaning so‘zlariga ko‘ra, ichki ishlar vaziri “oltin viza” tizimidan noqonuniy daromadlarini “yuvadigan” xorijlik fuqarolar ham foydalanishi mumkinligidan xavotirda.
Ta’kidlanishicha, sxema Ukraina atrofidagi keskinlik davrida “iflos pullar” ustidan nazorat kuchayishi fonida barbod bo‘lgan. Ichki ishlar vaziri investitsiya uchun fuqarolikni taqdim etish sxemasini bir qancha davlatlar, jumladan, Rossiya, Xitoy va Qozog‘istonning korrupsioner amaldorlari va o‘ta boy odamlari tomonidan suiiste’mol qilinayotganidan tashvishlangani sababli to‘xtatishga qaror qilgan.
2018-yildan boshlab “kriminal moliya” to‘g‘risidagi qonunga ko‘ra, Buyuk Britaniya hukumati Yevropa Ittifoqidan bo‘lmagan va Buyuk Britaniyada yashovchi yirik boylik egalariga “kelib chiqishi noma’lum bo‘lgan boylik so‘rovlari”ni qo‘llashi mumkin. Ushbu mexanizm hukumatga boylik egalaridan 50 ming funt sterlingdan ortiq qiymatdagi aktivlarining kelib chiqishini tushuntirishni talab qilish imkonini beradi. Boylik egalari o‘z aktivlarining kelib chiqishi qonuniy ekani bo‘yicha hukumatni ishontira olmasa, ushbu aktivlar xatlanadi. Britaniya hukumati hozirga qadar bu kabi mexanizmni uch marta qo‘llagan xolos.
Izoh (0)