Буюк Британия бадавлат хорижликларга киритилган инвестиция эвазига мамлакат фуқаролигини олиш имконини берувчи «олтин визалар»ни бекор қилишни режалаштирмоқда. Бу ҳақда ҳукуматдаги манбасига таяниб, Daily Mail хабар берди.
Нашр манбасининг маълум қилишича, ички ишлар вазири Прити Пател кейинги ҳафта бундан 13 йил олдин лейбористлар томонидан Буюк Британияга инвестиция жалб қилиш учун жорий этилган «олтин визалар» бериш зудлик билан тўхтатилишини эълон қилади.
Ушбу дастур қоидаларига кўра, 2 миллион фунт стерлинг миқдорида сармоя киритган шахслар Буюк Британияда уч йил яшаш ҳуқуқига эга бўлади ва кейинчалик уни икки йилга узайтириши ҳам мумкин.
Манбанинг сўзларига кўра, ички ишлар вазири «олтин виза» тизимидан ноқонуний даромадларини «ювадиган» хорижлик фуқаролар ҳам фойдаланиши мумкинлигидан хавотирда.
Таъкидланишича, схема Украина атрофидаги кескинлик даврида «ифлос пуллар» устидан назорат кучайиши фонида барбод бўлган. Ички ишлар вазири инвестиция учун фуқароликни тақдим этиш схемасини бир қанча давлатлар, жумладан, Россия, Хитой ва Қозоғистоннинг коррупционэр амалдорлари ва ўта бой одамлари томонидан суиистеъмол қилинаётганидан ташвишлангани сабабли тўхтатишга қарор қилган.
2018 йилдан бошлаб «криминал молия» тўғрисидаги қонунга кўра, Буюк Британия ҳукумати Европа Иттифоқидан бўлмаган ва Буюк Британияда яшовчи йирик бойлик эгаларига «келиб чиқиши номаълум бўлган бойлик сўровлари»ни қўллаши мумкин. Ушбу механизм ҳукуматга бойлик эгаларидан 50 минг фунт стерлингдан ортиқ қийматдаги активларининг келиб чиқишини тушунтиришни талаб қилиш имконини беради. Бойлик эгалари ўз активларининг келиб чиқиши қонуний экани бўйича ҳукуматни ишонтира олмаса, ушбу активлар хатланади. Британия ҳукумати ҳозирга қадар бу каби механизмни уч марта қўллаган холос.
Изоҳ (0)