Ukraina prezidenti Vladimir Zelenskiy mamlakat Milliy xavfsizlik va mudofaa kengashining (MXMK) davlat xavfsizligi strategiyasini tasdiqladi. Tegishli farmon Ukraina prezidentining rasmiy saytida e’lon qilingan.
Hujjatda mamlakat uchun real hamda kelgusida yuzaga kelishi mumkin bo‘lgan tahdidlar belgilab berilgan.
Strategiyada, jumladan, Rossiyaning o‘z strategik maqsadlarini amalga oshirish uchun Ukrainaga qarshi turgani, gibrid urush boshlagani, bunda siyosiy, iqtisodiy, axborot-psixologik vositalar va kiberhujumlardan foydalanayotgani qayd etilgan.
Shuningdek, strategiyada Ukrainada bosib olingan hududlardagi hukumatlar (Ukraina Kiyev ixtiyoridan chiqqan Qrim, shuningdek, Donetsk hamda Lugansk viloyatlari DXR va LXRni shunday atagan) inson va fuqarolar huquqlarini, Ukraina davlat xavfsizligi, hududiy yaxlitligi talablarini qo‘pol ravishda buzmoqda.
Bundan tashqari, hujjatda Ukrainaga nifoq soladigan mamlakat ichida va undan tashqaridagi mafkuraviy tahdidlar, nizolar keltirib chiqarishga qaratilgani, Rossiyaning axborot mustamlakachiligi fonida jamiyat yaxlitligini buzishga da’vat etadi.
Ukraina davlat xavfsizligi siyosatining yo‘nalishlari sifatida quyidagilar belgilangan:
- davlat xavfsizligini ta’minlash va YeI hamda NATO qonunlariga hamohang tarzda milliy qonunchilikni takomillashtirish;
- davlat sirlari va xizmat sirlari xavfsizligini ta’minlashda NATO va Yevroittifoq xavfsizlik standartlaridan kelib chiqish;
- davlat xavfsizligini ta’minlashda yangi yo‘nalishlarni joriy etishda xalqaro dasturlarga qo‘shilish.
2021-yil dekabr oyi oxirida Ukrainada axborot xavfsizligi strategiyasi tasdiqlangan. Hujjatda yetti asosiy maqsad belgilangan, ulardan biri axborot makonida Rossiya tomonidan qilinayotgan dezinformatsiya va boshqa axborot xurujlariga qarshi kurashishdan iborat.
Yanvar o‘rtasida Ukraina TIV rahbari Dmitriy Kuleba harbiylarni chegara hududida ko‘paytirayotgan Rossiyani tiyib turish yuzasidan reja taqdimotini o‘tkazgan. Rejada uchta asosiy band mavjud: diplomatik sa’y-harakatlar, sanksiyalar ishlab chiqish va G‘arb mamlakatlari hamda Ukraina o‘rtasida mudofaani kuchaytirish borasida hamkorlikni mustahkamlash. Keyinchalik rejaga yana bir band qo‘shildi: Ukrainaning iqtisodiy va moliyaviy barqarorligini ta’minlashga ko‘maklashish.G‘arb OAV va siyosatchilar 2021-yil oktabr oyi oxiridan beri Rossiyaning Ukrainaga hujum uyushtirishga tayyorlanayotganini taxmin qilib, Moskvani Kiyevga nisbatan tajovuzkor siyosat yuritishda ayblab kelmoqda. 14-fevral kuni Rossiya mudofaa vazirligi mamlakat armiyasining Ukraina bilan chegara hududidagi keng miqyosli mashg‘ulotlari yakuniga yetishini e’lon qildi, ertasi kuni esa Janubiy hamda G‘arbiy harbiy okruglar o‘quv mashg‘ulotlardan ortga qaytayotganini bildirdi. Zelenskiy Ukrainaning Rossiya harbiylarining chegara hududidan chiqib ketayotganini sezmayotganini qayd etdi.
Izoh (0)