Buxoro viloyat prokuraturasi viloyatdagi qurilishlarda 1,2 mlrd so‘m mablag‘ “yeb ketilgani”ni ma’lum qildi

Buxoro viloyat prokuraturasi viloyatdagi qurilishlarda 1 milliard 238 million so‘m mablag‘ “yeb ketilgani”ni ma’lum qildi. Bu haqda viloyat prokuraturasida jinoyatchilikning oldini olish va unga qarshi kurashish masalasi yuzasidan o‘tkazilgan matbuot brifingda aytildi, deya xabar berdi “Daryo” muxbiri.

Ta’kidlanishicha, qo‘zg‘atilgan jinoyat ishlari tergovi davomida 1 milliard 238 million so‘m zararning 446 million so‘mi undirilgan. Ayni paytda esa 791 million so‘mni undirish choralari ko‘rilmoqda.

“Bitta jinoyat sud muhokamasiga, to‘rtta jinoyat transport prokuraturasiga yuborilgan bo‘lib, 12 ta jinoyat ishi yuzasidan tergov harakatlari olib borilmoqda. Jinoyat tufayli yetkazilgan zararni ixtiyoriy qoplamagan aybdor shaxslarga nisbatan qat’iy choralar qo‘llanilishi belgilangan”, — deydi viloyat prokuraturasi axborot xizmati rahbari Anvar Esanov.

Matbuot brifingida ta’kidlanishicha, yuqoridagi holatlardan tashqari yana 12 ta tekshiruv hujjati bo‘yicha 16 ta qurilish obyektida tekshirish ishlari davom etmoqda.

“Ayrim holatlarda pudratchi korxonalar tomonidan amalga oshirilgan soxtakorliklar fosh etilmoqda. Birgina Buxoro shahrining Hamza ko‘chasidagi 1,2 kilometr yo‘lni rekonstruksiya qilish bo‘yicha 2 milliard 935 million so‘mlik ishlar aslida bajarilmagan bo‘lsa-da, soxta ma’lumotlar kiritish orqali qo‘shib yozilgani aniqlandi”, — deydi mas’ullar.

Viloyat prokuraturasi bo‘limi boshlig‘i Dilshod Toshev qurilish sohasida sodir etilayotgan jinoyatlarning oldini olishda jamoatchilik nazorati muhimligini ta’kidladi.

“Jamoatchilik nazoratini oshirish, budjet mablag‘lari hisobidan quriladigan obyektlardagi qurilish sifati va ajratilgan mablag‘larning to‘g‘ri sarflanishini kuzatib borish maqsadida Telegram’da bot ishga tushirildi. Ushbu bot korrupsiya va talon-torojliklarning oldini olishga xizmat qiladi. Biz bu borada ko‘proq Siz jurnalist va blogerlarga tayanamiz”, — dedi Dilshod Toshev.

Ma’lum qilinishicha, viloyatda 2022-yil oxiriga qadar 100 ta ijtimoiy soha obyektida 904,5 milliard so‘mlik qurilish-montaj ishlari amalga oshirilishi ko‘zda tutilgan. Mazkur 100 ta qurilish obyektidan 31 tasi yildan-yilga o‘tuvchi, 69 tasi esa yangidan qurilishi belgilangan obyekt hisoblanadi.