Kino ijodkorlari tomoshabinlarni qoyilmaqom poster bilan lol qoldirish niyatida kulgili xatoliklarga yo‘l qo‘ygan holatlar (foto)

Ba’zida hatto yirik kinostudiyalar uchun ham million dollarlik budjetga ega filmga afisha yaratish qiyinchilik tug‘dirishi mumkin. Dizaynerlar boshqalardan ajralib turadigan yorqin afisha yasashga harakat qilib, fotoshop yordamida aktyorlarning qomatlarini to‘g‘rilaydi yoki yangi surat qo‘shadi. Shu sabab ham ayrim hollarda film posterlarida xatolikka yo‘l qo‘yiladi.

AdMe nashri mashhur Gollivud filmlarining ana shunday xato va kamchiliklarga ega afishalarini e’tiboringizga havola qiladi.

“Bosh qahramon”

“Bosh qahramon” filmi afishasidagi bu xatolikni esa rossiyalik dizayner Konstantin Konovalov payqab qolib, o‘zining Twitter’ida yozgan. Haqiqatan ham diqqat bilan qarasangiz, Rayan Reynoldsning orqasidagi fonda Moskva Sitining osmono‘par binolarini ko‘rish mumkin.

“Superqiz”

Superqahramon qiz haqidagi ilk filmlardan biri “Superqiz” kassabopligi bo‘yicha omadsizlikka uchradi. Ammo bu kartinaning yagona muvaffaqiyatsizligi emas. Afishada ham xatolik yuz bergan: qiz Ozodlik haykali yonidan uchib o‘tmoqda, aslida, mash’ala haykalning afishadagi kabi chap qo‘lida emas, o‘ng qo‘lida bo‘lishi kerak.

“Chiroyli ayol”

“Chiroyli ayol” shu qadar uzoq suratga olinganki, Richard Girning sochlari oqarib ketganmi? Siyrak oq sochlar har doim aktyorning e’tibor tortadigan jihati bo‘lib kelgan, ammo nega dizaynerlar uni afishada bo‘yashga qaror qilishgani tushunarsiz.

“Birinchi qasoskor: boshqa urush”

Marvel Studios ham “Birinchi qasoskor: boshqa urush” filmining afishalarida o‘z superqahramonlarini yanada mukammal ko‘rsatish uchun harakat qilishda ajralib turadi. Muxlislar Qora beva obrazidagi Skarlett Yoxanssonning belini haddan tashqari ingichkalashtirganini darhol sezishgan, garchi aktrisa fotoshopsiz ham ajoyib ko‘rinadi.

“To‘qqiz yard – 2”

Oh, Bryus Uillisning qanday nafis oyoqlari bor-a! Ishonish qiyin. Ammo bu hali hammasi emas: afishada Metyu Perri oqargan qoshlari bilan malla bo‘lib ko‘rinadi, garchi filmda uning sochlari qora. Vengriya mafiozining katta qo‘llari bosh qahramonlar yelkasiga beo‘xshov tashlangani ham e’tiborni tortadi.

“O‘rgimchak odam: Uydan uzoqda”

Marvel’ning haqiqiy muxlislaridan hech narsani yashirib bo‘lmaydi, ijtimoiy tarmoqda ulardan biri ikkita plakatni ham suratga olib: “Xo‘sh, qaysi ko‘z shikastlangan?” — deb so‘ragan. Darhaqiqat, bitta afishada bandaj o‘ng ko‘zda, ikkinchisida - chapda. Hatto Samuel L. Jeksonning o‘zi ham bu postni ko‘rib, Instagram’da: “Bu yerda nimalar bo‘lyapti o‘zi?” deb izoh qoldirgan.

“O‘rgimchak odam: Uyga yo‘l yo‘q”

Franshizaning so‘nggi qismi ham diqqatni tortadi. Ehtimol, dizaynerlar belgilangan muddatda ulgurmay, zudlik bilan afisha tayyorlashlari kerak bo‘lgandir. Ular o‘rgimchak odamni filmning hech bir joyida kiymaydigan eski “odatiy” kostyumda tasvirlashgan. Keyinchalik, bu afisha yangisi bilan almashtirilgan, unda bosh qahramon zamonaviy temir kostyumda ko‘rinish beradi.

Ammo ijtimoiy tarmoqlardagi muxlislar allaqachon grafik dizaynerlarni qoralab, nega filmning birinchi yarmida tasvirlangan o‘rgimchak odamning zamonaviy libosini chizishmaganiga izoh so‘rashgan.

“Kong: Bosh suyagi oroli”

King Kong haqidagi navbatdagi filmning afishasi biroz chalg‘ituvchi. Ulkan maymun yonidan uchib o‘tayotgan vertolyot uning katta ko‘zlari oldida juda kichik ko‘rinadi. Filmning o‘zida esa “temir qushlar” ancha katta. Kongning boshi qarshisida turgan asosiy qahramonlar bilan solishtirilganda, chindan ham posterda xatolik ketganini ko‘rasiz.