Yangi Zelandiya Tashqi ishlar vazirligi o‘z fuqarolarini Ukraina hududini zudlik bilan tark etishga chaqirdi, deb xabar beradi “Interfaks”.
Idora tomonidan e’lon qilgan bayonotda ushbu chora “Rossiya va Ukraina o‘rtasidagi ziddiyatning ortib borayotgani” bilan izohlangan.
Avstraliya bosh vaziri Skott Morrison ham mamlakat fuqarolariga shu kabi murojaatni yo‘llagan. Avstraliya OAVlarining yozishicha, u Ukrainadagi vaziyatni “juda xavfli” deb atagan.
10-fevralda AQSh davlat departamenti fuqarolarga Ukrainaga bormaslik yoki zudlik bilan Rossiya harbiy harakatlari xavfi bo‘lgan va COVID-19 bilan kasallanishlar ko‘paygan hududdan ketishni tavsiya etgan. AQSh prezidenti Jo Bayden Ukrainadagi barcha amerikaliklardan hoziroq mamlakatdan ketishni so‘ragan. 11-fevral kuni esa Niderlandiya, Chernogoriya, Yaponiya va Janubiy Koreya o‘z fuqarolariga Ukrainaga bormaslikni tavsiya qildi va u yerda bo‘lganlardan mamlakatdan chiqib ketishni so‘radi.
Shuningdek, Latviya TIV ham o‘z fuqarolariga Ukrainadan chiqib ketishni maslahat bergan.
Rossiya harbiylarining Ukraina chegaralariga joylashishi tufayli AQSh, Avstraliya, Buyuk Britaniya, Germaniya, Kanada, Yaponiya, Isroil Ukrainadagi diplomatlarining bir qismi hamda ularning oilalarini boshqa yerga evakuatsiya qilgan.
Izoh (0)