7-fevral kuni Toshkent viloyati hokimining birinchi o‘rinbosari lavozimiga tayinlangan Xolmirza Niyozov 12-fevral kuni soat 07:00 ga viloyatdagi tuman hokimlari, boshqarma va tashkilotlar rahbarlarini yig‘ilishga chaqirdi. Ijtimoiy tarmoqlarda tarqalgan xatda prezident qarori ijrosi yuzasidan selektor yig‘ilishi ekani qayd etilgan. Bandlik va mehnat munosabatlari vazirligi mazkur holatga munosabat bildirib, Davlat mehnat inspeksiyasi joyiga chiqib o‘rganganini ma’lum qildi.
Xatda viloyat hokimligi studiyasidan viloyat hokimining o‘rinbosarlari, viloyat prokurori, IIBB va DSB boshliqlari, Qishloq va suv xo‘jaligi kotibiyatiga kiruvchi boshqarmalar, Mahallabay ishlash va tadbirkorlikni rivojlantirish agentligi, Kadastr agentligi, DXA va boshqalar qatnashishi yozilgan. Tumanlar hokimliklari studiyasidan esa 4 ta sektor rahbarlari, tuman hokimining o‘rinbosarlari va boshqa davlat tashkilotlari rahbarlari ishtirok etishi qayd etilgan.
Mehnat vazirligining ma’lum qilishicha, 12-fevral kuni ertalab ushbu vaziyatga aniqlik kiritish maqsadida, vazirlik Davlat mehnat inspeksiyasi boshlig‘i Qudratullo Odinayev Toshkent viloyati hokimligiga borgan. “Inspeksiya xodimlari soat 07:10 atrofida hokimiyat binosiga kirib borganda, majlis o‘tkazilayotganini aniqladi. Biroq yig‘ilganlar vazirlik vakillarini ko‘rishi bilan majlisdan chiqib ketishgan”, — deyiladi xabarda.
Mazkur holatda Ma’muriy javobgarlik to‘g‘risidagi kodeksning 49-moddasi 1-qismida (mehnat va mehnatni muhofaza qilish to‘g‘risidagi qonunchilikni buzish) ko‘rsatilgan ma’muriy huquqbuzarlik alomatlari mavjud ekani aytilmoqda. Ushbu moddaga ko‘ra, mansabdorning mehnat qonunchiligini buzishi BHMning 5 baravaridan 10 baravarigacha (1,35 million so‘mdan — 2,7 million so‘mgacha) miqdorda jarima solishga sabab bo‘ladi.
Eslatib o‘tamiz, 2020-yil 14-yanvardan buyon shu vaqtga qadar Farg‘ona viloyatining Oltiariq tumani hokimi vazifasida ishlab kelgan Xolmirza Niyozov 7-fevral kuni Toshkent viloyati hokimining qishloq va suv xo‘jaligi masalalari bo‘yicha birinchi o‘rinbosari sifatida tanishtirilgandi.
Mavzuga doir: Buxoro viloyati hokimi dam olish kuni to‘rtta tumanda yig‘ilish o‘tkazgani tasdiqlandi
Izoh (0)