Mahalla va oilani qo‘llab-quvvatlash vaziri Rahmat Mamatov Samarqand viloyati Ichki ishlar boshqarmasi boshlig‘i lavozimiga tayinlandi, deya xabar berdi “Daryo” muxbiri.
Qayd etilishicha, ayni kunga qadar viloyat IIBga rahbarlik qilib kelgan Shavkat Rahmonov boshqa ishga o‘tgan. Ammo uning aynan qaysi lavozimga tayinlangani haqida ma’lumot yo‘q.
Rahmat Mamatov 1967-yil Qashqadaryo viloyatida tug‘ilgan bo‘lib, 1991-yil Qarshi davlat universitetini, 2000-yilda Ichki ishlar vazirligi akademiyasini tamomlagan.
U vazirlikka qadar Fuqarolarning o‘zini o‘zi boshqarish organlari faoliyatini muvofiqlashtirish bo‘yicha Respublika kengashi raisining birinchi o‘rinbosari — “Mahalla” xayriya jamoat fondi raisi lavozimida ishlab kelgan. Rahmat Mamatov faoliyati davomida, shuningdek, Ichki ishlar vazirining birinchi o‘rinbosari, Farg‘ona viloyat IIB boshlig‘i lavozimlarida faoliyat yuritgan.
Avvalroq Toshkent shahar Ichki ishlar bosh boshqarmasi boshlig‘ining birinchi o‘rinbosari lavozimida ishlab kelgan Muhiddin Jo‘rayev Farg‘ona viloyati IIB boshlig‘i lavozimiga tayinlangani xabar berilgandi.
Izoh (0)