Xitoyning “Tayshan” AESda radiatsiya darajasi oshgani ma’lum qilindi

Xitoyning “Tayshan” atom elektr stansiyasi(AES)da yonilg‘i sterjenlarining shikastlanishi sababli radiatsiya darajasi oshdi. Bu haqda Global Times xabar berdi.

Xitoy Atrof-muhitni muhofaza qilish vazirligining ma’lumotlariga ko‘ra, 1-energiya blokining birinchi konturida kuzatilgan radiatsiya darajasi ko‘tarilishining asosiy sababi shundaki, energiya bloklarining ishlashi davomida yonilg‘i ishlab chiqarish, tashish, yuklash va boshqa nazoratdan tashqari omillar tufayli yonilg‘i sterjenlarida kichik shikastlanish yuzaga kelgan.

Ta’kidlanishicha, hozirgi vaqtda 1-energiya blokidagi birinchi kontur issiqlik tashuvchisida radioaktivlik darajasining oshishi qayd etilgan. Shunga qaramay, AES texnik reglamentda belgilangan me’yor bo‘yicha ishlamoqda.

Avvalroq Yaponiya hukumati XXR rasmiylaridan AESdan radioaktiv inert gazlar chiqishi mumkinligi haqidagi xabarlar bilan bog‘liq vaziyat haqida ma’lumot so‘ragan edi. Yaponiya mazkur xabarlardan chuqur xavotir bildirib, Xitoyga shaffoflik ruhidagi ma’lumot bilan ta’minlash to‘g‘risida iltimosnoma yuborgan. Ayni paytda Tokio vaziyat yuzasidan Pekinning izohini kutmoqda.

Shu bilan birga, Yaponiyadagi radiatsiyani kuzatish stansiyalari ushbu bosqichda hech qanday o‘zgarishlarni qayd etmagan.

“Tayshan” atom elektr stansiyasi Xitoy janubidagi Guandun viloyatida, Gonkong yaqinidagi Janubiy Xitoy dengizi sohilida joylashgan. AES tarkibida Fransiyaning Areva kompaniyasi tomonidan ishlab chiqarilgan quvvati 1750 MVt bo‘lgan ikkita energiya bloki bor. Ular 2018 va 2019-yillarda tijoriy maqsadda foydalanishga topshirilgan.

14-iyun kuni CNN xabar berishicha, AQSh hukumati bir hafta davomida Xitoyning “Tayshan” AESdan radiatsiya nurlari sizib chiqishi ehtimolini baholagan. Xabarga ko‘ra, AES pudratchilaridan biri — Fransiyaning Framatome kompaniyasi AQSh rasmiylariga ushbu obyektdagi “muqarrar radiatsiya xavfi” haqida ma’lum qilgan.