Xitoy AQShdan Tayvanga qurol-yarog‘ yetkazib berishni to‘xtatishni talab qildi

Xitoy TIV rasmiy vakili Chjao Liszyan AQSh hukumati Tayvanga 100 million dollarlik qurol-yarog‘ partiyasini yetkazib berish fikridan qaytishi zarurligini qayd etdi. Bu haqda “TASS” xabar bergan.

“Xitoy Xalq Respublikasi ushbu holatga keskin e’tiroz bildiradi va mazkur harakatni qoralaydi. AQShni “yagona Xitoy” prinsipiga rioya etishga, uchta Xitoy–AQSh kommyunikesidagi talablarga bo‘ysunishga, zudlik bilan Tayvanga qurol yetkazib berish bo‘yicha yuqorida qayd qilingan rejani bekor qilishga chaqiramiz”, – degan diplomat.

Xitoy Tashqi ishlar vazirligi vakilining so‘zlariga ko‘ra, AQShning bu kabi harakatlari Xitoy suverenitetiga, mamlakatning xavfsizlik sohasidagi manfaatlariga jiddiy zarar yetkazadi, shuningdek, “Xitoy–AQSh munosabatlari”, Tayvan bo‘g‘ozidagi tinchlik va barqarorlikka ham putur yetadi.

“Xitoy o‘z suverenitetini mustahkamlash va xavfsizlik sohasidagi manfaatlarini ta’minlash uchun kerakli hamda samarali chora-tadbirlarni amalga oshiradi”, – deya qo‘shimcha qilgan mazkur chora-tadbirlarni hamma ko‘rishini ta’kidlab Chjao Liszyan.

O‘z navbatida AQSh Mudofaa vazirligining xavfsizlik yo‘nalishida hamkorlik qilish agentligi (DSCA) Davlat departamentining Tayvanga texnik ko‘mak berish, xizmatlar va Patriot zenit raketa komplekslarini taqdim etishni tasdiqlaganini bildirgan. Kelishuvning qiymati – 100 million dollar.

DSCA kelishuvga ko‘ra, Patriot zenit raketa komplekslariga xizmat ko‘rsatish dasturini amalga oshirmoqchi va bu AQSh hukumatining talabi ekanini qayd etgan. Raytheon Technologies konserni va Lockheed Martin korporatsiyasi pudratchilar sifatida ro‘yxatga olingan.

Avval Pentagon AQShning agar orol bu haqida iltimos qilsa, u holda Tayvanni tashqi zo‘ravonlikdan himoya qilishga tayyorligini ma’lum qilgandi.

Shuningdek, Tayvan orolda AQSh harbiylarining borligini tasdiqlagan. Biroq orol ma’muriyati orolda o‘quv mashg‘ulotlari doirasida aynan qancha harbiy joylashtirilganiga aniqlik kiritmagan.