Andijon viloyatida 2021-yil davomida nomusga tegish va unga suiqasd qilish bilan bog‘liq jinoyatlar 17 tadan 20 taga ortgan. Bu haqda viloyat hokimligida o‘tkazilgan majlisda ma’lum qilindi, deya xabar bermoqda “Daryo” muxbiri.
Ma’lum qilinishicha, 2021-yilda 3970 ta oilaning nikohdan ajralgani qayd etilgan. Ajrim yoqasiga kelib qolgan oilalar soni 2020-yilga nisbatan 846 taga ko‘paygan. Ajrimlarning 1267 tasida moddiy yetishmovchilik, 1582 tasida o‘zaro kelishmovchilik va meros nizosi (qaynona, qaynota va kelin o‘rtasida), 560 tasida farzandsizlik, 397 tasida uzoq muddat birga yashamaslik, 64 tasida er va xotin o‘rtasidagi xiyonat, 51 tasida migratsiya va 49 tasida ichkilik hamda giyohvandlikka ruju qo‘yish holatlari asosiy sabab bo‘lgan.
2021-yil davomida nomusga tegish va unga suiqasd qilish bilan bog‘liq jinoyatlar 17 tadan 20 taga ortgan. Oqibatda 18 nafar xotin-qiz jabrlangan bo‘lsa, ulardan 7 nafarini voyaga yetmagan qizlar tashkil qiladi.
Ta’kidlanishicha, jinoyatlardan jabr ko‘rgan ayollar soni 185 tani tashkil qilgan bo‘lib, ularning 6 nafari vafot etgan.
“Oilalardagi ijtimoiy va iqtisodiy muammolar ruhiy holatning o‘zgarishiga, hatto o‘z joniga qasd qilishgacha olib kelmoqda. Xususan, xotin-qizlar tomonidan o‘z joniga qasd va suiqasd qilish holatlari 117 ta sodir etilgan bo‘lib, shundan 39 tasi oiladagi muntazam ravishda bo‘lib kelgan kelishmovchiliklar oqibatida sodir etilgan. Voyaga yetmagan qizlar tomonidan o‘z joniga qasd qilish holatlari 18 tadan 24 taga, 30 yoshgacha bo‘lgan qizlar tomonidan 40 tadan 56 taga oshgan. Eng achinarlisi, 3 nafar ayol o‘t qo‘yish orqali o‘z joniga qasd qilgan”, — deydi viloyat Ichki ishlar boshqarmasi huquqbuzarliklar profilaktikasi boshqarmasi boshlig‘i Xurshidbek Abdurahmonov.
Eslatib o‘tamiz, Andijon viloyatida 2021-yilda ayollar tomonidan sodir etilgan jinoyatlar 477 tadan 830 taga ortib, umumiy jinoyatlarning 12 foizini tashkil etgan.
Izoh (0)