Андижон вилоятида 2021 йил давомида номусга тегиш ва унга суиқасд қилиш билан боғлиқ жиноятлар 17 тадан 20 тага ортган. Бу ҳақда вилоят ҳокимлигида ўтказилган мажлисда маълум қилинди, дея хабар бермоқда «Дарё» мухбири.
Маълум қилинишича, 2021 йилда 3970 та оиланинг никоҳдан ажралгани қайд этилган. Ажрим ёқасига келиб қолган оилалар сони 2020 йилга нисбатан 846 тага кўпайган. Ажримларнинг 1267 тасида моддий етишмовчилик, 1582 тасида ўзаро келишмовчилик ва мерос низоси (қайнона, қайнота ва келин ўртасида), 560 тасида фарзандсизлик, 397 тасида узоқ муддат бирга яшамаслик, 64 тасида эр ва хотин ўртасидаги хиёнат, 51 тасида миграция ва 49 тасида ичкилик ҳамда гиёҳвандликка ружу қўйиш ҳолатлари асосий сабаб бўлган.
2021 йил давомида номусга тегиш ва унга суиқасд қилиш билан боғлиқ жиноятлар 17 тадан 20 тага ортган. Оқибатда 18 нафар хотин-қиз жабрланган бўлса, улардан 7 нафарини вояга етмаган қизлар ташкил қилади.
Таъкидланишича, жиноятлардан жабр кўрган аёллар сони 185 тани ташкил қилган бўлиб, уларнинг 6 нафари вафот этган.
«Оилалардаги ижтимоий ва иқтисодий муаммолар руҳий ҳолатнинг ўзгаришига, ҳатто ўз жонига қасд қилишгача олиб келмоқда. Хусусан, хотин-қизлар томонидан ўз жонига қасд ва суиқасд қилиш ҳолатлари 117 та содир этилган бўлиб, шундан 39 таси оиладаги мунтазам равишда бўлиб келган келишмовчиликлар оқибатида содир этилган. Вояга етмаган қизлар томонидан ўз жонига қасд қилиш ҳолатлари 18 тадан 24 тага, 30 ёшгача бўлган қизлар томонидан 40 тадан 56 тага ошган. Энг ачинарлиси, 3 нафар аёл ўт қўйиш орқали ўз жонига қасд қилган», — дейди вилоят Ички ишлар бошқармаси ҳуқуқбузарликлар профилактикаси бошқармаси бошлиғи Хуршидбек Абдураҳмонов.
Эслатиб ўтамиз, Андижон вилоятида 2021 йилда аёллар томонидан содир этилган жиноятлар 477 тадан 830 тага ортиб, умумий жиноятларнинг 12 фоизини ташкил этган.
Изоҳ (0)