Buxoro viloyati Olot tumanida tibbiyot texnikumiga o‘qishga kiritib qo‘yish uchun pul talab qilgan shaxs qo‘lga olindi, deb xabar beradi Bosh prokuratura huzuridagi departament.
Ma’lum qilinishicha, Bosh prokuratura huzuridagi departamentning Olot tuman bo‘limi tomonidan tezkor tadbir o‘tkazilgan. Tadbir davomida M.Q. ismli shaxs fuqaro R.ning ishonchiga kirib, uni tanishlari yordamida Buxoro tibbiyot texnikumiga o‘qishga kiritib qo‘yish evaziga 800 dollar olgan vaqtida ashyoviy dalillar bilan ushlangan.
Shuningdek, departament hamda DXXning Samarqand viloyati boshqarmalari tomonidan o‘tkazilgan tezkor tadbirda Samarqand temiryo‘l texnikumi o‘qituvchisi K.A. fuqaro Sh.ni 800 dollar evaziga ushbu texnikumiga o‘qishga kiritib qo‘yishni va’da qilgani aniqlangan. K.A. kelishilgan pulning 700 dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent viloyatida fuqaroni xorijiy OTMga kiritib qo‘yish va bir yildan keyin o‘qishni O‘zbekistonga ko‘chirib berish uchun 10 ming dollar so‘ragan shaxslar ushlangani, Jizzaxda soxta diplom yasab sotuvchilar qo‘lga olingani, Buxoroda hamshiralikka ishga joylashtirish uchun 600 dollar olgan bosh shifokor ushlangani to‘g‘risida xabar berilgandi.
Izoh (0)