Бухоро вилояти Олот туманида тиббиёт техникумига ўқишга киритиб қўйиш учун пул талаб қилган шахс қўлга олинди, деб хабар беради Бош прокуратура ҳузуридаги департамент.
Маълум қилинишича, Бош прокуратура ҳузуридаги департаментнинг Олот туман бўлими томонидан тезкор тадбир ўтказилган. Тадбир давомида М.Қ. исмли шахс фуқаро Р.нинг ишончига кириб, уни танишлари ёрдамида Бухоро тиббиёт техникумига ўқишга киритиб қўйиш эвазига 800 доллар олган вақтида ашёвий далиллар билан ушланган.
Шунингдек, департамент ҳамда ДХХнинг Самарқанд вилояти бошқармалари томонидан ўтказилган тезкор тадбирда Самарқанд темир йўл техникуми ўқитувчиси К.А. фуқаро Ш.ни 800 доллар эвазига ушбу техникумига ўқишга киритиб қўйишни ваъда қилгани аниқланган. К.А. келишилган пулнинг 700 долларини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Тошкент вилоятида фуқарони хорижий ОТМга киритиб қўйиш ва бир йилдан кейин ўқишни Ўзбекистонга кўчириб бериш учун 10 минг доллар сўраган шахслар ушлангани, Жиззахда сохта диплом ясаб сотувчилар қўлга олингани, Бухорода ҳамшираликка ишга жойлаштириш учун 600 доллар олган бош шифокор ушлангани тўғрисида хабар берилганди.
Изоҳ (0)