Qashqadaryo viloyati Chiroqchi tumanida Majburiy ijro byurosi xodimlariga qarshilik ko‘rsatgan fuqaroga sud hukmi o‘qildi. Bu haqda Nasafnews xabar qildi.
Qayd etilishicha, MIB Chiroqchi tuman bo‘limi boshlig‘i o‘rinbosari va 3 nafar davlat ijrochisi 2021-yilning 28-oktabr kuni Chiroqchi tuman sudining ijro varaqasiga asosan da’vogar A.Ch.ning foydasiga 113 million 330 ming qarzdorlikni undirish maqsadida javobgar A.M.ning yashash uyiga borgan.
Qarzdorlikni undirish maqsadida uning hovlisida turgan bir bosh otni xatlamoqchi bo‘lishganida fuqaroning akasi J.M. xizmat vazifasini bajarayotgan hokimiyat vakillarining qonuniy faoliyatiga faol qarshilik ko‘rsatib, ularni nojo‘ya so‘zlar bilan haqorat qilgan. Dastlab davlat ijrochisi M.X.ni, so‘ngra ularni ajratish maqsadida kelgan davlat ijrochisi U.X.ni urib, tan jarohati yetkazgan.
Mazkur holat bo‘yicha Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismi bilan jinoiy ish qo‘zg‘atilib, jinoyat ishi sudga yuborilgan.
14-yanvar kuni sud majlisida sudlanuvchi J.M. aybiga iqror bo‘lib, qilmishidan qattiq pushaymonligini, kelgusida bunday jinoyatga qo‘l urmasligini, oilaviy va moddiy sharoiti og‘ir ekanini bildirib, o‘ziga nisbatan yengillik berilishini so‘ragan.
J.M. Jinoyat kodeksining 219-moddasi 1-qismida nazarda tutilgan jinoyatni sodir etganlikda aybli deb topilib, unga nisbatan 6 oy ozodlikdan mahrum qilish jazosi tayinlangan.
Mavzuga doir:
- Andijonda MIB xodimini pichoq bilan jarohatlagan fuqaro qamoqqa olindi
- Farg‘onada er-xotin 32,5 mln so‘m qarzdorligini undirishga kelgan MIB xodimiga o‘z chaqalog‘ini yoqib yuborish bilan tahdid qildi
- “Kasbida bolta bilan chopishga, Yakkabog‘da yoqishga, Shahrisabzda mashinada bosib ketishga urinishgan”. Qashqadaryoda MIB xodimlariga qilingan tajovuzlar haqida
Izoh (0)